Dowers: Otro miembronan di gerencia lo sigui maneha KIA awor

ORANJESTAD - Aunke director di KIA a tuma su retiro, por lo pronto tin miembro(nan) di gerencia pa sigui cu maneho. Asina minister di Husticia Arthur Dowers a declara diahuebs anochi. Tabata diahuebs mainta cu e mandatario a confirma e noticia na NoticiaCla.com cu Trudy Hassell a tuma su retiro di e funcion di director di KIA. El a agrega cu e ausencia di un director na e institucion por lo pronto no lo tin efecto riba continuidad di maneho como cu tin un otro trahadonan riba nivel di liderazgo cu ta ocupa nan mes cu maneho diario di e institucion den ausencia di un director.

COMUNICACION

E minister a subraya cu e comunicacion, ni e relacion di trabao entre e y Hassell no tabata entre e motibonan cu a conduci na e decision di e ex-director. Dowers a elabora tocante loke a conduci na e retiro di e director di KIA y e siguiente pasonan. Segun Dowers, tempo cu Hassell a wordo scogi entre e solicitantenan pa e funcion na KIA, a acorda riba tres aspecto cu mester tin prioridad den su maneho: e trato pa cu e detenidonan pa mehora nan situacion y oportunidadnan pa resocialisacion y baha e cantidad di recidivista; desaroyo di e personal y e situacion laboral en general; y e planning pa mehoracion di e infrastructura fisico di e compleho.

COMUNICACION PERSONAL Y PRESONAN

Pa loke ta trata e parti humano, por a nota un mehoracion den e situacion di e presonan, pero di otro banda e comunicacion entre e director y e miembronan di personal tabata deficiente y hasta malo den algun caso. E sindicatonan y Minister Dowers tabata reuniendo pa basta siman tocante e relacion y comunicacion entre directiva y personal y e sindicatonan a vocifera nan malcontento na varios ocasion. Ademas, Minister Dowers a ricibi directamente na su ministerio diferente keho for di e miembronan di personal. El a splica cu el a hiba diferente combersacion den e ultimo simannan cu e director, e personal y e sindicatonan, pero ora cu a resulta cu no tabatin un solucion bastante eficiente pa e conflicto, a pone un comision independiente pa sondea y duna un bista den e situacion y raporta bek na e minister nan punto di bista tocante e relacion entre e personal y e directiva.

PROPOSICION NA HASSELL

Minister Dowers a bisa cu e conclusion tabata cu “e relacion ta di tal indole cu e no ta sin risico pa e institucion y pa e siguridad di e “voortgang” di e institucion”. Pa motibo aki el a hiba un combersacion cu Trudy Hassell riba e tema aki y a haci un proposicion pa un formula cu den concepto di e mandatario lo ofrece un tipo di relacion cu por garantisa y ofrece trankilidad den e institucion. Manera cu e website aki a raporta caba, e reunion aki a tuma luga diaranson atardi, unda cu e director a bisa Minister Dowers cu e ta entrega su retiro como cu no por biba cu e proposicion presenta. Cu e director no por haya su mes den e formula cu e mandatario a presenta ta algo cu Minister Dowers ta respeta.

ENCARGO CU E LEIDING

Por lo pronto tin otro personanan encarga cu e leiding di e institucion y no lo tin cambionan grandi; y lo ta evaluando e procedura pa yega bek na un structura di maneho pa e institucion, Minister Dowers a comenta. Berdad ta cu semper lo tin miembronan di personal cu lo coopera cu cambionan pa hiba e institucion den bon direccion, Minister Dowers a expresa, añadiendo cu tabatin tension y aunke e parti di e detenidonan tabata bayendo miho, no por a logra crea miho comunicacion entre e directiva y e personal pa garantisa trankilidad, siguridad y continuidad.

EXPRESION DI SEPPA

Loke a resalta, segun e mandatario, ta e expresion di sindicato SEPPA durante di e reunionnan. E representantenan di e trahadonan a bisa cu ta pa 25 aña, pues pa hopi tempo cu no a haya un maneho cu nan ta kere ta un maneho adecua pa KIA. Minister Dowers a expresa cu e ta comparti e opinion aki cu nan y ta pensa cu esaki tin di haci cu e structura y parti fisico di e organisacion. KIA ta un institucion dificil pa maneha, el a remarca. E caracter di e organisacion, cu ta uno cera unda cu por wordo uza poder, tanto di parti di e director(nan) como di parti di otro miembronan di leiding y personal, pa hopi tempo sin cu esaki ta wordo scrutina pa partnernan pafo ta crea e situacionnan cu tin awendia. “Mi ta convenci cu e creamento di un structura, un directiva diferente cu nos a conoce te na e momento aki lo duna resultado,” Minister Dowers a añadi.

TRANSCURSO DI AÑA

Den transcurso di e ultimo añanan varios cos a cambia, tambe bao di Trudy Hassell, y a wak mehoracion, pero tin pasonan y tin bastionnan institui cu mester hala pa e organisacion bay na bira un organisacion mas moderno, segun Minister Dowers. El a agrega cu lo tin oposicion semper sigur pa esunnan cu ta mara na pensamentonan y filosoficianan bieu. Cada bes cu pasa den un situacion dificil tin lesnan nobo pa siña y esakinan por wordo uza pa crea un maneho mas balansa. E sindicatonan cu ta representa e trahadonan den KIA a expresa nan preocupacion, pero tambe nan boluntad pa participa na yega na solucionnan. Na mes momento nan ta admiti cu tin cosnan cu no ta bay bon y aunke tin hopi miembro cu ta contribui na e procesonan positivo, tin entre nan cu tambe ta contribui cu cosnan menos bon cu hasta ta afecta nan mesun coleganan den e sindicato. Nan ta consciente cu tin regla y leynan cu mester mantene y Minister Dowers a bisa cu lo envolve e sindicatonan den algun decision importante, kisas den un formula manera “ondernemingsraad” cu ta conoci na Hulanda. E sindicatonan a bisa di lo para tambe tras di e parti di maneho cu kisas por ta rigido y kisas no semper ta positivo pa tur miembro, pero si ta asina cu mayoria di nan miembronan ta sinti cu cosnan mester cambia, Minister Dowers a comenta. El a conclui bisando cu e problemanan no tabata cu e personal no tabata di acuerdo cu puntonan di maneho cu ta por cierto e mes tabata parti di e formulacion, pero nan tabata keha mas cu tur cos tocante e manera, e “speed” y e comunicacion di ser humano pa ser humano cu pa nan tabata deficiente.