Na St Maarten a condena ex minister pa posecion ilegal di pistol di aire

W’STAD/PHILIPSBURG - Ex minister di Asuntunan Konstitushonal di Antianan Hulandes i èks minister di Finansa di St. Maarten, Richard Gibson a haña un kastigu kondishonal di 1 aña pasobra el a trata di drenta St. Maarten ku un pistol di airu ilegal dia 15 di sèptèmber 2024. Tambe Korte den Promé Instansia a kondená Gibson na un but kondishonal di 250 dòler ku e lo mester paga den kaso ku e kometé kualke otro delito durante di su periodo di prueba di 1 aña.

Armanan di airu ta konsiderá den mayoria kaso un arma ilegal pasobra nan ta parse un arma di kandela real ku por usa pa kometé un krímen manera robo òf atrako. Personal di duana na aeropuerto internashonal Princes Juliana di St. Maarten a nota e arma di airu den ekipahe di Gibson. Durante tratamentu di su kaso den korte Gibson, ku ta un hurista di profeshon, a bisa ku el a kumpra e pistol di airu na Panama i no tabata sa ku e mester di un pèrmit di minister pa por a importá esaki.

Shaira Bommel ku ta e abogado defensor di Gibson a pidi korte pa su kliente sali liber di tur akusashon den su kontra. El mustra ku no ta tur arma di airu ta ta klasifiká komo arma ilegal i ku outoridatnan investigativo no wòri pa hasi un inspekshon tékniko i forénsiko di e arma di airu di Gibson. “Un eksperto mester determiná ku ta trata di un arma di airu ilegal. Kon un hende por sa esei adelantá”, Bommel a bisa.

Fiskal di Ministerio Públiko no ta di akuerdo ku ponensia di e defensa i a bisa ku no tin duda ku e arma di airu ta konsiderá komo un arma ilegal konforme e lei di arma di pais. El a pidi hues pa imponé un but di mil dòler riba Gibson. “E ta paresido na un arma di kandela”, e fiskal a bisa. “E ta un arma ilegal, kon ku bo mir’é.”

Bommel na su turno a indiká ku ni maske konsiderá ku Gibson ta kulpabel, no por imponé un kastigu riba dje. El a referí na un karta di èks minister di Hustisia, Lyndon Lewis fechá 20 di novèmber 2024, ku ta konfirmá ku Gibson por ta den posishon di e arma di airu pasobra e no mester di un pèrmit pa esaki. Tambe e abogado a mustra ku duana a duna Gibson e arma di airu bèk.

Na opinion di fiskal e karta di eks minister Lewis no ta relevante pasobra Gibson tabatin mester di e pèrmit promé ku el drenta pais ku e arma di airu. Tambe el a splika ku e personal di duana a kometé un fayo atministrativo dunando Gibson e arma di airu bèk sin aprobashon previo di Ministerio Públiko. Korte a bai di akuerdo ku fiskal di Ministerio Públiko bisando ku e karta ku eks minister Lewis a duna Gibson, despues ku el a drenta St. Maarten ku e arma di airu, no ta relevante.

Hues a indiká sinembargo ku Gibson no a demostrá di tin intenshonnan kriminal, pero e echo ku e arma di airu tabata den su ekipahe ta prueba ku esaki tabata den su poseshon. Hues a sentensia Gibson na un kastigu di un but kondishonal di 250 dòler i un periodo di prueba di 1 aña. E èks minister por disidí ainda si e ta bai den apelashon kontra e veredikto. NOTA: Texto ta scirbi den Papiamento fonetico di Corsou.