Entrada MAVO pa HAVO no ta den man mas di schoolnan so

ORANJESTAD – Dentro di poco Colegio Arubano y otro scolnan secundario no por dicidi unilateralmente mas riba e admision di alumnonan di MAVO pa HAVO. Y ora papia di HAVO, ta referi primordialmente na HAVO di Colegio Arubano. Esey minister di enseñansa Michelle Hooyboer Winklaar a confirma na NoticiaCla.com Durante di un conferencia di prensa, Hooyboer a anuncia formalisacion di e cambio di ley cu ta garantisa normanan di admision nacional di MAVO pa HAVO. E cambio di ley aki ta prescribi cu e stipulacion di normanan di admision mester bay den deliberacion den un comision cu ta conseha Minister di Enseñansa pa loke ta e normanan di admision pa tur scol di enseñansa secundario na Aruba.

NORMA DI ADMISION

E ley ta evita cu cada directiva di scol ta traha cu diferente norma di admision y cu por adapta of hisa esaki sin mas. E cambio di ley aki mester garantisa uniformidad, transparencia, claridad y accesibilidad di enseñansa pa nos hobennan di Aruba. Ta trata aki di e “Landsbesluit dagscholen MAVO, HAVO, VWO” cu a keda formalisa dia 1 di juli 2015 y publica dia 2 di juli 2015 via di “Afkondigingsblad” di Aruba. E ley ta disponibel riba www.ea.aw.

E TRAYECTORIA

For di januari 2014 Minister di Enseñansa tabata den deliberacion cu directiva di e fundacion cu ta maneha Colegio Arubano, esta SMOA, tocante e maneho di admision pa alumnonan di MAVO. E deliberacionnan riba e topico aki ta uno largo, intensivo y cu a conoce diferente contratiempo. Despues di mas cu un aña di deliberacion y diferente iniciativa y accion mester indica cu lastimamente ainda SMOA y Gobierno no ta comparti e mesun vision y opinion. Den ful e proceso aki e punto di salida di e mandatario encarga cu enseñansa semper tabata cu ta kere den e potencial di nos hobennan y cu tur hoben merece e oportunidad pa sigui studia y demostra nan mes. E ta e responsabilidad di e alumno pa haci su maximo esfuerso y e ta e responsabilidad di e scol, directiva di scol y di Gobierno pa facilita e hoben cu tur lo necesario pa por saca lo maximo di su potencial.

REUNION CU SMOA

Segun e mandatario di enseñansa, cu e punto di salida aki a sinta na mesa y comunica cu SMOA. Na varios ocasion durante reunionnan y den corespondencia a mustra SMOA riba su responsabilidad. Hisa norma di admision sin inverti den contenido di enseñansa no tin sentido, mirando cu e situacion ta keda mescos y e problema a djis wordo hala di un banda pa otro. Si bo kier traha na calidad di berdad, mester inverti den e contenido, den e maestronan y den e guia di alumno. Esey ta e unico manera pa realisa un mehoracion di berdad y cu ta sostenibel.

DOORSTROOM

Minister di Enseñansa a mustra e importancia cu e doorstroom di MAVO pa HAVO tin pe y cu Gobierno y tur nos directivanan di scol tin un responsabilidad hopi grandi pa garantisa e accesibilidad di enseñansa pa tur nos hobennan. SMOA a indica na inicio di e deliberacionnan cu no tin ningun problema pa laga alumnonan di MAVO drenta basta cu Gobierno cumpli cu algun condicion cu nan tin. Lastimamente a bin resulta cu e condicionnan aki no tabata tin di haber directamente cu mehoracion di e conexion entre MAVO-HAVO pero tabata mas bien otro deseonan y exigencianan cu SMOA tabata tin pa entre otro drecha e “Aafwateringsysteem” di e tereno di scol y tambe pa ekipa tur klas cu “laptop” y “smartboards”.

INVERSION CU SMOA

Minister di Enseñansa no a descarta cu lo por delibera riba e inversionnan adicional aki cu SMOA, pero a mustra SMOA cu un tono hopi fuerte cu no por mara e deliberacion tocante e accesibilidad di HAVO pa nos hobennan na otro deseonan di SMOA. Na e momento ey Minister di Enseñansa a mustra su decepcion riba e directiva di Colegio Arubano caminda cu a señala cu no por perde e interes di e hobennan y e interes general for di bista. Cu e posicion cu SMOA a tuma na e momento ey a pone hopi duda den nan intencion y motivacion pa cu e cambionan cu nan ta insisti riba dje riba e maneho di admision. Cu e exigencianan cu nan a mara na e deliberacion a mustra cu pa SMOA e maneho di admision pa MAVO no ta un cuestion di principio pero cu SMOA mas bien ta willing pa “bargain” cu futuro di nos hobennan. Esaki no tabata aceptabel pa e Minister actual di Enseñansa y como contesta a manda un carta hopi fuerte pa SMOA pa nan reconsidera nan posicion y ta urgi nan pa no trece e puntonan aki mas dilanti den e deliberacion actual tocante admision.