Situacion laboral tenso na DIMAS, cu menasa di accion

ORANJESTAD – E situacion laboral na DIMAS ta di tal forma, cu un ora pa otro trahadonan por bandona pia di trabou, den forma di protesta. Tur esaki tin di haber cu desaroyo den e ultimo 48 ora, unda cu un persona a haya un nombracion halto, sin cumpli cu e proceso ‘regular’. Durante reunion di personal diahuebs atardi na DIMAS, nan a bin tende cu e waarnemend director, Mario Wever a wordo nombra como adjunct director, y cu un structura su tras cu ta practicamente isola e actual director Kathy Ruiz Paskel di tur cargo.

NOMBRACION POLITICO

Loke tin e trahadonan rabia, ta cu e proceso no tabata uno transparente. De hecho, nan ta considera esaki uno netamente politico, unda cu di un dia pa otro, ta nombra un persona pa un funcion asina clave, sin cu tabatin solicitud habri. A compronde cu un funcion asina, mester wordo anuncia pa duna chens pa por solicita p’e. Algo cu no a sosode den e caso aki.

CAMBIA ORGANOGRAM

Hunto cu e nombracion, ta bin cu for di oficina di minister, a bin e ordo pa cambia e organisacion di tal forma cu hopi hende ta haya nan mes ta cay bou di e persona aki diripiente (Wever), y esey ta algo cu nan no ta di acuerdo cune.

SALARIO HALTO

Mas informacion cu NoticiaCla.com saca afo, ta cu no solamente e nombracion ta molestia e trahadonan, sino tambe e salario cu e persona aki lo bay gana awor. Di un dia pa otro, su schaal lo subi como tres nivel, y yega posiblemente te schaal 14, cu posibilidad pa yega 15.

ACCION

E trahadonan a mustra cu nan no ta nada contento y kier pa para e nombracion aki, sino nan ta bay den accion. Mirando cu e director Ruiz Paskel a bisa nan cu ta te dialuna e ta topa cu e minister, nan a bisa caba cu nan no ta warda y no ta descarta cu pa mayan mainta (diabierna), nan por pone trabou abou como forma di protesta