Diahuebs mainta Gobernador ta huramenta 5 parlamentario y diabierna 1 mas

ORANJESTAD – Despues cu formadornan Eman y Croes entrega nan relato di formacion na gobernador SE Alfonso Boekhoudt diamars ultimo, e scenario ta cla pa huramenta e respectivo ministernan y consecuentemente tambe e parlamentarionan cu ta reemplasa esnan den Parlamento cu entrante diabierna ta bira minister. 

Diahuebs mainta pa 10’or Gobernador lo huramenta e parlamentarionan Carlos Bermudez (AVP), Marlon Sneek (AVP), Otami Tomasia (AVP), Muzaninn Wever (FUTURO) y Ruthlyn Lindor (FUTURO) na e Cas Ceremonial. Un candidato pa Parlamento ta huramenta diabierna awor, cu ta Jonathan Hart (AVP). E motibo di dos diferente dia ta cu e presidente y vice-presidente di Parlamento no ta retira na mes momento.  E mesun diabierna mainta 10’or despues di huramenta sr Hart, Gobernador lo huramenta e 6 candidatonan pa minister, esta Mike Eman, Arthur Dowers, Mervin Wyatt-Ras, Wendrick Cicilia, tur di AVP, y pa FUTURO, Gerlien Croes y Geoffrey Wever. Esaki tambe lo tuma lugar na Cas Ceremonial. 

ULTIMO REUNION DI GERLIEN CROES

Mientrastanto diaranson atardi 4’or a tuma lugar tratamento di e geloofsbrieven di e parlamentarionan, cual tur a keda cla y despues Gerlien Croes a dispidi como presidente di Parlamento siendo cu e tabata su ultimo reunion dirigiendo Parlamento ya cu diabierna e ta huramenta como minister.