St. Maarten ta lansa plannan pa industria di cannabis

W’STAD/PPHILIPSBURG.- Gobièrnu di St. Maarten tin intenshon pa introdusí leinan elaborá riba cannabis. Esaki ta deskribí den e programa di gobernashon 2024-2028 di e aktual koalishon. E leinan ta pa manehá kultivo, distribushon i uso di mariwana.

A base di e leinan aki ke balansá seguridat públiko ku desaroyo di un sektor ekonómiko kaminda ta pone enfoke riba regulashon estrikto riba salubridat, seguridat i konsumo di mariwana. E plannan aki ta bai kai bou di e Ministerio di Turismo, Asuntunan Ekonómiko, Transporte i Telekomunikashon.

Di akuerdo ku e programa di gobernashon t’asina ku e legislashon ku ta bai traha riba dje tin komo meta pa protehá seguridat públiko pa medio di limitá konsumo di mariwana bou di sierto kondishon i imponé reglanan di salubridat i seguridat estrikto. Banda di regulá seguridat públiko, gobièrnu di St. Maarten ta mira un potensial ekonómiko grandi den e industria di cannabis.

E intenshon di e lei ta pa eksplorá kon cannabis por bira un sektor ekonómiko nobo pa St. Maarten i atraé potensial turistanan pa e isla generando mas entrada. E gobièrnu di St. Maarten ta antisipá ku e industria di cannabis ta krea oportunidat pa invershonistanan lokal i empresarionan loke. Esaki ta diversifiká ekonomia i krea kuponan di trabou nobo.

E inisiativa pa introdusí un tipo di legislashon asin’aki lo dependé di kampañanan di informashon i konsulta ku stakeholders pa asina sigurá ku sektornan públiko i privá ta komprondé i ta sostené e metanan di e potensial industria nobo aki.

Durante debate riba presupuesto 2025 na yanüari último, promé minister di St. Maarten, Luc Mercelina, a hasi un yamada dramátiko sinembargo riba miembronan di parlamento ku mester organisá legalisashon di cannabis di un manera apropiá pa motibu di su kompleksidat. Salú mental ta algu ku no ta organisá na St. Maarten.

El a bisa ku 71 porshento di kasonan di problema mental ku ta trata na e sentro pa salú mental ta debí na uso òf abusu di cannabis. Komo e lider dje koalishon aktual e sa alabes ku e pais ta konfrontá ku desafionan manera kuido di salú, salú mental, desempleo, kriminalidat i e retonan bou di hubentut. El a laga komprondé bon klá ku no mester konsiderá su komentarionan komo sifuera e ta pro òf kontra legalisashon di cannabis.

Mas aleu el a atvertí miembronan di parlamento pa no duna yu nòmber promé ku e nase, ya ku St. Maarten ya kaba a hasi diferente eror den pasado. Asta paisnan grandi den Europa manera Hulanda mes ku tin un sistema di kontròl tur kaminda, tin problema ku uso di cannabis. NOTA: Texto ta scirbi den Papiamento fonetico di Corsou.