InselAir ta subi frecuencia di vuelo pa cuater destinacion

ORANJESTAD - Ultimo tempo tin un demanda grandi pa e destinacionnan ariba menciona conecta cu InselAir su red di 24 destinacion. Pa esey InselAir lo subi su cantidad di vuelo pa Paramaribo, Port-au-Prince, Kingston y Santo Domingo.

OCHO VUELO SEMANAL PA PARAMARIBO

InselAir ya caba ta ofrece vuelo diario pa Paramaribo y entrante 3 di juli lo ofrece un vuelo extra saliendo for di Corsow riba diabierna. E vuelo lo sali for di Corsow Airport Hato pa 20:25 y lo yega Paramaribo 23:55. E vuelo di regresa lo sali pa Corsow riba diasabra pa 7:15 y lo aterisa na Corsow pa 9:00.

VUELO DIRECTO PA PORT-AU-PRINCE: AWO 3 BIAHA PA SIMAN

Pa mehora e conexion pa Port-au-Prince, pero tambe pa ofrece mas posibilidad pa otro destinacion for di Port-au-Prince, InselAir lo añadi un vuelo directo di Corsow pa Port-au-Prince na su schedule di dialuna, cual lo subi e frecuencia na un total di 3 vuelo pa siman. E vuelo lo sali for di Corsow pa 9:50 y lo aterisa na Port-au-Prince pa 11:50. E vuelo di regreso lo sali riba e mesun dia pa 12:50 y lo yega Corsow pa 14:50. E frecuencia adicional aki lo cuminsa dia 6 di juli 2015.

KINGSTON: 3 VUELO PA SIMAN

Lo añadi un vuelo pa Kingston riba diaranson cu lo sali pa 10:10 di Corsow y lo baha na Kingston pa 11:40. E vuelo ta sali mesun dia pa 12:40 y lo yega na Corsow pa 16:10.

VUELO DIARIO PA SANTO DOMINGO CU 2 VUELO DIRECTO

Desde 2 di juni InselAir ta bula non stop 2 biaha pa siman for di Corsow pa Santo Domingo riba diamars y diabierna. E vuelo di diamars ta sali pa 9:50 y ta yega Santo Domingo pa 11:40. E vuelo di regreso ta sali 12:30 y ta yega Hato pa 14:20. Riba diabierna e vuelo ta sali pa 15:20 y ta baha na Santo Domingo pa 17:10. E vuelo di regreso ta sali pa 18:00 y ta yega Corsow pa 19:50.