OM: Chauffeur di prome minister Wever-Croes ta keda encarcela por lo pronto

ORANJESTAD - Huez a dicidi awe, riba peticion di Fiscal di Husticia, pa duna ordo pa detencion (gevangenhouding) di e sospechoso Siki  K. pa un termino di 90 dia, den cuadro di un investigacion di delitonan sexual. Vocero di Ministerio Publico Ann Angela confirma esaki diabierna merdia pa noticiacla.  Prome cu e periodo aki termina, e sospechoso mester wordo presenta (pro-forma) dilanti Corte den Prome Instancia. E investigacion ta continua.

E CASO

Tabata diamars 4 di maart ultimo, cu ministerio Publico a informa cu polis a detene e chauffeur K. relaciona cu un investigacion cu tin andando di delitonan sexual. Durante e registro den cas di K. na Papilon a confisca cargadornan di informacion, como tambe seis arma di candela y un cantidad considerable di municion. K. ta ambtenaar di funcion y durante periodo di gabinete Wever-Croes 1 y 2, ta fungi como chauffeur pa prome minister di Aruba Evelyn Wever-Croes.  Noticiacla a compronde cu e ta un miembro di club di tiramento, y cu e armanan lo ta pertenece na e club aki. 

SHOCK

Despues di un dia, prome minister demisionario Wever-Croes a comenta cu e la keda den shock pa e noticia, y cu e ta laga husticia haci su trabou. E la bisa mesora cu como chauffeur, e sospechoso a haci semper un bon trabou. 

Ministerio Publico a bisa di lo no duna mas detaye na e momento aki pa garantiza e integridad di e investigacion