Hassell: E motibo cu el a entrega retiro como director di KIA

ORANJESTAD – Tabata despues di un reunion entre minister di husticia Arthur Dowers y director di KIA Trudy Hassell diaranson merdia, cu cosnan a sosode cu a resulta cu Hassell a dicidi di entrega su retiro. E directora a papia diaranson cu NoticiaCla.com den forma exclusivo, y splica kico tur a sosode y con e la resulta den su decision pa retira di un forma practicamente abrupto y , -pa hopi-, completamente di sorpresa.

E REUNION

E reunion mes tabata uno ameno y profesional segun Hassell, durante cual a discuti e ultimo desaroyo cu tabatin na KIA, y e resultado di e evaluacion di e comision cu minister a institui, den cuadro di e kehonan cu a sosode den e instituto coreccional. “Durante e combersacion eynan, tabata duidelijk pami kico tabata e kehonan y tambe e resultado di e investigacion”. Mes momento, Hassell su conclusion tabata cu e no por a ‘sigui traha bou di e condicionnan cu nan a combersa’. ”Y e ora mi a entrega mi retiro”, Hassell a sigui bisa.

BIN KIA BEK

Riba e pregunta cu si esey ta nifica cu Trudy Hassell no ta bin KIA bek (como director), e la splica lo siguiente: “Durante e combersacionnan cu tabatin cu e empleadonan, -den mi opinion-, a scucha solamente un banda di medaya” Hassell a cuminsa splica. Y segun e director, pa por tin un ‘total picture’ di kico ta pasando na KIA, bo mester tende tambe e banda di medaya di empleadonan, cu si ta haya cu e cambionan cu ta wordo implementa (na KIA), ta bon y no ta haya cu nan tin problema cu Hassell. “Dus mi ta kere cu ambos partido mester wordo scucha. Si en caso minister dicidi cu, scuchando e otro banda di medaya di e otro coleganan, -cu ta tremendo trahado, hendenan hopi integro y recto, y hendenan aki tambe kier tur cos bay bon den KIA-, si minister dicidi cu e ta asercami bek pa (traha den ) KIA como director di institucion, lo mi tum’e”, Hassell a sigura e website aki.

TRES META

Hassell ta motiva e decision ey tambe, argumentando cu e la bin KIA cu tres meta. Entre nan, tin pa drecha e infrastructura di KIA, traha riba proyecto di reintegracion y resocialisacion di detenidonan, pero tambe pa traha na beneficio di e bewakernan pa asina traha riba nan ‘upgrading y rechtspositie’. Esey ta e tres metanan. “Mi ta spera cu ainda, -despues di e evaluacion-, mi por haya un oportunidad pa contribui na KIA pa cu esey”. Pero pa Hassell aworaki, su decision ta final. “Mi a entrega mi funcion. Mi no a entrega mi retiro como ambtenaar, sino como director di KIA. Ta te ora cu minister di husticia, -cu tin e ultimo palabra-, dicidi cu e ta acepta esey, mi ta keda standby”. Mientrastanto e la laga tur hende cu e mensahe aki. “Trudy Hassel ta un hende cu durante tur su carera, a cana stret, ta un persona hopi integro, y mi ta kere cu un organisacion cu mi mester dirigi, esey ta e meta tambe dimi. Pa e organisacion ey tambe mester ta integro. Y tanten cu mi tin e impresion cu mi no por logra e meta ey, lo mi no bay bek” Hassell a finalisa bisando. NOTA: foto cortesia BonDia Aruba.