Bermudez: “AZV a ricibi pago di BAZV desde luna di Mei”

ORANJESTAD - “AZV a cuminsa ricibi nan pago desde luna di Mei” minister di finanza Angel Bermudez a sigura awe den un comunicado, reaccionando riba e publicacion di NoticiaCla.com di awe. Den e publicacion, AZV su representante ta confirma cu for di su implementacion, -ley di BAZV-, AZV no a haya ningun depchi. Segun Bermudez, esey no ta completamente corecto, pues e ta contradeci declaracion di e persona di AZV. 

CONTRATIEMPO

Segun Bermudez a confirma ayera cu e publicacionnan aki no ta cuadra cu datonan existente for di administracion financiero di Gobierno. For di e cifranan aki, e ekipo di administracion financiero di gobierno por deduci cu for di fin di mei a inicia cu e pagonan na AZV di e BAZV. “Sin embargo e mandatario ta clarifica cu en berdad esaki a conoce contratiemponan despues di su introduccion unda cu durante e prome lunanan e pago na AZV no por a wordo procesa ni administra adecuadamente na Departamento di Impuesto”. Sin embargo, e mandatario ta sigura cu na varios ocasion y den Staten, Minister Bermudez  a declara esaki caba.

INFORMACION TABATA DISPONIBEL

Pues e contratiemponan aki tabata conoci pa publico for di comienso unda cu na mes momento esunnan envolvi tabata trahando riba solucionnan al caso pa cu e situacion aki. Tur esten e contratiemponan aki a wordo resolvi pa cual desde luna di mei, manera indica cu e mandatario a indica, pagonan a bira posibel y ta tumando luga, “semanalmente AZV ta ricibi un voorschot, asina mensualmente e cuenta final aki por wordo conclui”, asina e Minister Bermudez a confirma.

DECLARACION DI AZV

Tabata awe mainta cu NoticiaCla.com a bin cu e informacion, confirma for di AZV, cu mientras cu gobierno a aumenta e health tax (BAZV) cu 1% na un total di 2%, cu destinacion exclusivo pa AZV, e instancia mes pa cual e placa ta destina, mes no a haya un debchi di e placa aki. E ehecutivo di comunicacion na AZV, Joost van de Kamp a confirma awe mainta na NoticiaCla.com, cu enberdad nan no a ricibi nada nada di e fondo di BAZV. Pues for di momento di su introduccion na december, AZV no a ricibi nada nada di e placa.

AUMENTO BAZV

Manera ta conoci, siman pasa parlamento a pasa e ley cu ta legalisa e aumento di BAZV for di 1% pa 2%. E ta un impuesto ‘nobo’, introduci na december ultimo pa yuda genera fondo pa AZV, y asina ‘librando’ gobierno di e peso aki. Cu e introduccion aki, gobierno su situacion financiero lo a mehora, y AZV lo a haya un inyeccion financiero structura pa mantene e instancia aki solvente.

PROBLEMA PA DISTINGUI

E ley a pasa berdad na december, unda cu tur luna AZV lo a haya 5 miyon florin di e impuesto aki, y pa aña e lo mester a genera 63.8 miyon pa aña. Departamento di impuesto lo mester a cobra esaki y pase pa AZV. Segun van de Kamp, e problema lo ta na departamento di impuesto, cu ‘lo no por distingui e BBO di BAZV'. NoticiaCla.com a tuma contacto cu departamento di impuesto pero no tabata exitoso. Minister di Finanza Angel Bermudez a referi nos na departamento di finanza, pero aki tampoco no tabatin exito ainda.