Partidonan dispuesto pa reuni awe riba formacion di gobierno nobo

ORANJESTAD – Por ta cu ya awe dialuna, comunidad ta conoce e nomber di e ministernan nobo di e gabinete nobo cu mester sinta proximamente. No tin nada oficial programa, pero tur partidonan ta habri y dispuesto pa reuni cu otro, aunke cu e oficina di gobernador mes oficialmente ta cera pa dianan di fiesta. Si ta bon, formadornan Mike Eman y Gerlien Croes mester a papia cu e candidatonan pa minister e fin di siman aki, y ricibi e ultimo resultado di screening di e candidatonan diabierna ultimo. Manera cu Noticiacla a bisa diabierna caba, e biaha aki no tin un fecha specifico stipula pa e siguiente encuentro entre formadornan y gobernador di Aruba, SE Alfonso Boekhoudt. 

OFICINA CERA

Mientras cu oficialmente e oficina di gobernador ta cera awe pa dia di fiesta (Himno & Bandera), no ta descarta cu asina mes lo por tin reunion pa informa e gobernador di e ultimo informacion.  Si esey no sosode awe dialuna, esey por bira diaranson e ora. E lo no tuma lugar dia 18 di maart pasobra ta dia di fiesta. Ademas tin ceremonia protocolario tambe, cu ta dificulta e reunion e ora di tuma lugar. Rta spera di por reuni cu e formadornan Mike Eman y Gerlien Croes ya na comienso di e siman aki pa consulta e acuerdo di gobernacion final y e alocacion di carteranan. Esaki ta e mensahe cu e formadornan a haya diahuebs. E pregunta ta kico esaki kier men realmente, mirando cu tin dianan liber otro siman tambe. 

DIAHUEBS MAINTA

Manera cu Noticiacla a raporta caba diahuebs, e mainta ey a wordo informa door di e formadornan, Sr. Mike G. Eman y Sra. Gerlien Croes di e progreso di e proceso di formacion. Ambos partido a indica cu nan ta den e proceso di finalisa e acuerdo di gobernacion. Loke a resulta ta cu e instancianan concerni pa cu e ehecucion di e ‘Landsverordening integriteit ministers’ a duna di conoce cu ainda nan no a logra termina cu nan trabounan den cuadro di e ley aki. Noticiacla a compronde cu ta 2 instancia ainda tabata ‘debe’ e formadornan, nan relato. 

MAS TEMPO

Mirando cu ta di suma importancia cu e instancianan aki por finalisa nan trabounan encuanto e ley di ‘Landsverordening integriteit ministers’, Gobernador a tuma e decision pa prolonga e encargo di formacion. Pero manera a bisa, no a duna un fecha specifico e biaha aki. 

TARDANSA

E proceso berdad ta durando largo pero esey Noticiacla a anticipa caba for di comienso, conociendo e reglanan y ley di screening y cu mirando e tempo cu a entrega e lista di nomber, cu e lo a bay dura mas cu normal. Comparando e screening di formador cu a tuma 3 siman, tabata logico cu esun aki, lo a dura mucho mas largo.