Director di KIA Trudy Hassell a entrega retiro ‘per direct’

ORANJESTAD – Director di Korectie Instituut Aruba (KIA), Trudy Hassell a entrega su retiro di funcion ‘per direct’, pasobra e no ta sinti cu e por fungi den e funcion bou di circumstancianan poni su dilanti. Hassell mes a confirma e informacion aki na NoticiaCla.com diaranson anochi. "E ta berdad. Mi a entrega mi retiro per direct", Hassell a sigui bisa. Minister Arthur Dowers no por a confirma e informacion completo na NoticiaCla.com y /of bay den detayes,  y a bisa solamente cu e lo duna un declaracion mayan mainta. Loke por a compronde di e mandatario, ta sinembargo, cu e noticia ta confirma pero cu tin posibilidad cu por tin cambio si di e pensamento di e director proximamente. 

ACCION

Manera ta conoci, recientemente despues di un accion di un grupo di trahado di KIA, a keda instala un comision pa minister di husticia, cu mester a analisa y procesa e lista di ‘keho’ cu tabatin formula pa e.o. e sindicato TOPA. E recomendacionnan mester a bay pa e mandatario, pa despues desicionan wordo tuma dentro di 10 dia cu e comision trece nan rapport. Unabez cu e rapport tabata cla, e sindicato a reuni cu e mandatario, pero e momento ey e mandatario a splica NoticiaCla.com cu no a tuma decision ainda.

CAMBIO DI MANEHO

Mientrastanto, lo a sugeri na Hassell, pa cambia su maneho y cu esaki mester bay bek pa un tipo di ‘management team’. Kico exactamente a keda ‘intercambia’ entre e mandatario awe tardi y e director di KIA awe tardi 3’or (ora e reunion a tuma lugar), no ta conoci pa NoticiaCla.com, pero e resultado tabata cu e director a dicidi cu e no ta keda mas na KIA y a entrega su retiro ‘per direct’. Foto ta di archivo di Trudy Hassell den funcion di comisario di polis.