Asina cu formadornan ta cla, nan por bishita gobernador!

ORANJESTAD – E biaha aki no tin un fecha specifico stipula pa e siguiente encuentro entre formadornan y gobernador di Aruba, SE Alfonso Boekhoudt ta spera di por reuni cu e formadornan Mike Eman y Gerlien Croes ya na comienso di otro siman pa consulta e acuerdo di gobernacion final y e alocacion di carteranan. Esaki ta e mensahe cu e formadornan a haya diahuebs. E pregunta ta kico esaki kier men realmente, mirando cu tin dianan liber otro siman tambe. 

LIBER DI FECHA

Noticiacla a compronde cu esaki por ta cualkier di e dianan aki, esta for di dialuna 17 di maart, of diaranson padilanti 19 di maart (dia 18 ta dia liber pues e dia ey no ta posibel). E mensahe tabata cu asina cu e formadornan ta cla, nan lo bin.  E resultadonan di e investigicacion realisa a base di e ‘Landsverordening integriteit ministers’ tambe lo wordo discuti e dia aki. Loke ta interesante ta cu Eman a anuncia cu mientras cu no tin tur info di screening ainda, toch a opta pa e fin di siman aki mes, papia cu e candidatonan, y adelanta e trabou asina, pensando cu pa diabierna caba e documentonan final di screening por ta aden. 

DIAHUEBS MAINTA

Manera cu Noticiacla a raporta caba diahuebs, e mainta ey a wordo informa door di e formadornan, Sr. Mike G. Eman y Sra. Gerlien Croes di e progreso di e proceso di formacion. Ambos partido a indica cu nan ta den e proceso di finalisa e acuerdo di gobernacion. Loke a resulta ta cu e instancianan concerni pa cu e ehecucion di e ‘Landsverordening integriteit ministers’ a duna di conoce cu ainda nan no a logra termina cu nan trabounan den cuadro di e ley aki. Noticiacla a compronde cu ta 2 instancia ainda tabata ‘debe’ e formadornan, nan relato. 

MAS TEMPO

Mirando cu ta di suma importancia cu e instancianan aki por finalisa nan trabounan encuanto e ley di ‘Landsverordening integriteit ministers’, Gobernador a tuma e decision pa prolonga e encargo di formacion. Pero manera a bisa, no a duna un fecha specifico e biaha aki. 

TARDANSA

E proceso berdad ta durando largo pero esey Noticiacla a anticipa caba for di comienso, conociendo e reglanan y ley di screening y cu mirando e tempo cu a entrega e lista di nomber, cu e lo a bay dura mas cu normal. Comparando e screening di formador cu a tuma 3 siman, tabata logico cu esun aki, lo a dura mucho mas largo.