Alarma grandi pa avioneta den problema

ORANJESTAD - Tabata alrededor di 11:30am cu Toren di Control di Aeropuerto a bati alarma na Centro di Alarma di Cuerpo di Bombero pa un avioneta Cessna modelo Cessna 206 di un motor cu un piloot y un pasahero abordo. E avion a caba di lanta for di Aruba y tabata rumbo pa Jamaica cu 5 ora di combustibel abordo. E piloot a informa Toren di Control cu el a haya problema cu su motor y a opta pa regresa Aruba.

BOMBERO ACTIVA

Mesora Cuerpo di Bombero a activa y a saca un unidad di su kazerne na Tanki Flip cu 6 Bombero den dje pa asina reenforsa e ekipo di 9 Bombero trahando na e kazerne di Aeropuerto. Di acuerdo cu e protocol ora di un alarma asina, a laga cera aeropuerto pa tur trafico aereo y a cera tur caminda cu ta pasa dilanti of yega aeropuerto.

ATERISAHE SIN PROBLEMA

Un rato despues e avion a baha sin ningun problema. E "Officier van Dienst" di Cuerpo di Bombero a bay na e avion pa asisti e tecniconan specialisa na e aeropuerto priva, conoci como General Aviation, cu a cuminsa cu un investigacion riba kico por a sosode cu a conduci cu e motor tabata trahando cu fayo.

ALARMA CANCELA

Na momento cu a confirma cu e avion tabata na tera y no tabata forma ningun peliger mas ni pa aviacion, ni pa e pasaheronan cu tabata abordo, a cancela e alarma.E personal di Cuerpo di Bombero di Aruba, specialmente esunnan staciona na e kazerne di Aeropuerto, ta specialisa den combati candela y efectua rescate riba tur tipo di avion cu ta baha na Aruba.