Corte a prohibi SKOA pa aumenta school geld y airco-geld

ORANJESTAD – Den un sentencia di huez awe mainta, -adelanta cu un siman-, Corte a dicidi cu Stichting Katholiek Onderwijs Aruba (SKOA) ‘no tin e derecho pa obliga mayornan pa paga e aumento di schoolgeld’. Abogado Hose Figaroa a confirma esaki na NoticiaCla.com awe aminta. Mes momento esaki ta nifica tambe cu SKOA no por pone condicion y consecuencia na esnan cu no paga schoolgeld y airco geld. E ta un decision temporal, cu condicion cu e grupo di mayor cu a bringa e caso, inicia un bodemzaak (caso di profundidad) den un periodo di 2 siman. E sentencia tabata originalmente planea pa dia 15 di juli proximo, pero sorpresivamente a keda dicta un siman prome.

VEREDICTO

Segun e veredicto, Corte ta di opinion cu tur gasto cu SKOA kier combati, pa medio di e aumento di e schoolgeld y airco geld anuncia, mester wordo cubri ,-segun ley-, pa pais Aruba. Aki huez a evalua, cu en todo caso, riba tereno financiero no por haci distincion entre mayornan di alumnonan inscribi na SKOA, y mayornan di alumnonan cu ta bay scol publico.

LOKE SI MAG HACI

Loke si SKOA ta autorisa pa haci, ta pa establece schoolgeld pa aña escolar 2015/16 pa combati gastonan cu no ta cay directamente bou di ‘gastonan di curiculo’, manera sportdag, schoolreisje, celebracion di Sinterklaas y pasco. Pero e pagonan aki no por ta ‘obligatorio’. Corte, manera indica caba, a mara na e prohibicion, cu e mayornan cu a entama e caso, mester cuminsa un ‘bodemprocedure’ (caso di profundidad) dentro di dos siman, riba e topico aki. Si SKOA no cumpli cu e sentencia, tin un  dwangsom di 1000 florin pa dia te un maximo di 1.5 miyon pa incumplimento. Ademas, SKOA  no mag di nenga niun mucha di wordo inscribi si nan no paga e schoolgeld nobo cu a wordo stipula

.