Varios entrada hudicial a tuma lugar relaciona cu detencion di Jamaloodin

WILLEMSTAD – Relaciona cu detencion di ex minister George Jamaloodin na Corsou diahuebs mainta, esaki a conduci na varios entrada hudicial cu te na e momentonan aki ainda ta tumando luga. Esei ta motibo dicon na e momentonan aki Ministerio Publico no por duna mas informacion tocante esaki. Loke si a confirma, ta cu e detencion di Jamaloodin (46) ta relaciona cu investigacion “Maximus”, esta di Magno Helmin Wiels. “Ta nos intencion pa emiti un otro comunicado pa prensa prome cu 2 or awe tardi. Esaki solamente den caso cu e investigacion ta permiti esei” Norman Serphos, vocero di Ministerio Publico a sigura NoticiaCla. Manera NoticiaCla a raporta den forma di primicia, tabata diahuebs marduga cu ex minister George Jamaloodin a keda detene na Corsou.. Jamaloodin ta miembro di partido Movimento Futuro Corsou (MFK) y tabata minister di finanzas entre 2010 y 2012. Actualmente e ta maneha su propio compania di seguridad riba e isla. Wiels mes a fayece dia 5 di mei 2013 na Corsou riba un beach. Lider di partido MFK, Gerrit Schotte no kier a duna un comentario diahuebs mainta ainda na NoticiaCla.