HEPPLE: Confirma cu turista venezolano no ta uza hotel mas

ORANJESTAD – E mercado Latino Americano pa Aruba ta apenas 20%, di cual Venezuela ta esun mas grandi. Di otro banda, e mayoria di venezolanonan ta opta awor pa no keda den hotelnan y resort manera ta conoci. AHATA tambe a confirma esey e siman aki. “Colombianonan di otro banda, y Brasileñonan, Peruanonan, Ecuadorianonan y otronan si ta keda den hotel”. E ta keda un mercado importante. E hecho cu Venezolanonan no ta opta pa hotelnan mas, no ta nifica cu e ta un causa perdi si.

MEXICO COMO MERCADO

Un mercado cu segun e CEO di AHATA, Jim Hepple ta uno bale la pena pa explora, ta Mexico. “Nan tin un populacion hopi grandi, di cual un gran cantidad ta hopi rico, y ta buscando camindanan diferente pa biaha” Hepple a bisa. E ta kere cu Mexico como tal, ta un oportunidad sigur.

MAS DESTINACION LATAM

Den latino America, ta haciendo esfuerso pa haya mercado di Peru. “Nos ta operando for di Peru caba, pero nos ta hacienda mas esfuerso pa haya aun mas”. Den Caribe ta mas dificil, aunke cu e buelo inaugural for di San Juan di InselAir Aruba, e ta yuda hopi. Pronto (otro siman) lo tin buelonan directo for di Republica Dominicano, cu sigur lo yuda. “E problema di visa for di Republica Dominicano tin cu wordo atendi, pero tin potencial eynan y resto di Caribe” Hepple a sigui bisa.