OM: Tardansa den investigacion ta debi na e.o. falta di personal

ORANJESTAD – Diahuehs, Ministerio Publico a bin afo pa purba splica e.o. e motibo di tardansa di e investigacion andando actualmente riba e caso di e morto di e hoben Lannooy. Mientras cu e comunicado di OM no ta bisa esey specificamente, ta un hecho cu esey ta e caso, ya cu OM mes ta cuminsa cu su declaracion bisando cu “:a nota cu den comunidad ta existi indignacion pa e falta di transparencia den investigacionnan penal”. Y e indignacion actual ta netamente pa e caso aki. Segun OM,  tambe a nota cu no semper comunidad tin comprension pa e tempo cu autoridadnan ta tuma pa investiga.  

INTERES DEN E INVESTIGACION

Ministerio Publico mester tene cuenta cu varios interes den un investigacion. Sigur den e fase inicial un investigacion generalmente no ta duna espacio pa divulga informacion tocante e contenido. Dor di haci declaracionnan tocante un investigacion cu ta andando, testigonan (por ehempel) por wordo influencia y esey ta perhudica e buskeda di e berdad. 

Ministerio Publico mester tene su mes na su obligacion legal di confidencialidad. Ademas ta asina cu victimanan of nan famia y tambe sospechosonan tin derecho riba proteccion di nan privacidad. Pa e motibonnan ey Ministerio Publico generalmente no ta divulga nombernan of potretnan di e sospechosonan ni di e victimanan. E no ta pa ta misterioso, sino pa proteha privacidad di tur esnan involucra.  

DURAMENTO LARGO

Investigacionnan penal sa dura largo. Esey por ta debi na e hecho cu ta trata di un investigacion complica of pasobra mester haci investigacion tecnico. Un investigacion tecnico por tuma hopi tempo, especialmente si ta investigacion tecnico complica cu mester wordo haci pa NFI (Nederlands Forensisch Instituut, Instituto Forense) na Hulanda. 

FALTA DI PERSONAl 

Ta bin acerca cu capacidad di Ministerio Publico ta limita segun e comunicado, pasobra (entre otro) no tur funcion den e formacion di Ministerio Publico ta cubri, debi na insuficiente presupuesto disponible. Dor di esaki Ministerio Publico ta bin ta lidiando añanan largo caba cu un falta structural di personal. 

E mesun cos aki ta conta pa e otro partnernan den cadena hudicial y tin consecuencianan pa e cantidad di investigacion cu por wordo haci y pa e periodo den cual nan ta wordo hiba.   

“No obstante, Ministerio Publico lo sigui traha incansablemente pa un sociedad husto, semper teniendo cuenta cu e interesnan di e victimanan, e famia y e sospechosonan”, e comunicado ta finalisa bisando.