DEZHI: Tarifanan impone pa Trump na Merca, lo afecta Aruba

ORANJESTAD – Cambio di tarifa manera cu presidente Mericano Trump ta imponiendo, lo tin efecto riba economia di Aruba. E pregunta ta, con hopi y kico por haci pa mitiga esaki. Noticiacla a logra pone su man riba un analsis cu Departamento di Economia di Aruba DEZHI a traha riba e efecto cu e cambio di tarifa cu e presidente di Merca Donald Trump a y ta imponiendo internacionalmente, lo tin riba economia di Aruba. Y ta resulta cu mientras cu ainda no ta cla si y con e tarifanan aki lo wordo impone, ta sigur cu tarifanan en general tin un efecto negativo riba economia. Mientras cu e efectonan exacto no por wordo calcula ainda ,ta anticipa cu e tarifanan lo hisa e gastunan pa e importacion di vehiculo, mashin y ekipo electrico ya cu e productonan aki ta wordo fabrica na Merca usando materialnan di tanto China como Mexico. Importacion di cuminda tambe ta core riesgo di wordo impacta pa tarifanan debí na e dependencia di Merca riba importacion di cuminda di Mexico. 

REACCION DI IMPORTADORNAN LOCAL

A pidi importadornan local pa pensa riba e politica di tarifa cu mayoria di e contesta ta cu e no lo aumenta nan gastonan. Esnan cu tabatin un strategia pa mitiga aumentonan di gasto potencial a inclui stop di importa e productonan aki of busca un proveedo no-mericano. Ta importante pa Aruba diversifica su importacion di cuminda for di otro mercadonan pa ta menos dependiente di e mercado Mericano den caso cu e tarifanan si ta afecta Aruba.

CON E ASUNTO A CUMINSA 

Tabata den e eleccion di Merca di 2024, cu e  candidato presidencial di e tempo ey Donald Trump a campaña cu e lo impone un tarifa di importacion mas halto riba productonan cu ta bini di varios partner comercial, incluyendo China. Como cu Aruba ta depende principalmente di importacion di otronan, Merca y China, ta importante pa evalua con e cambionan aki den politica por afecta economia di Aruba potencialmente.

E INTENCION DI E ANALISIS

E nota aki tabata delinea e impacto potencial di e tarifanan proponi riba Aruba y su consumidornan. E la cuminsa cu un splicacion cortico riba con e tarifanan ta funciona. Despues a presenta e tarifanan proponi pa presidente elegi Trump. E nota tambe a elabora riba e partnership comercial entre Merca y China. Sigui pa un analisis riba importacion di Aruba cu lo por wordo afecta door di e tarifanan. Adicionalmente a sondea e perspectivanan di negoshinan di Aruba y diversificacion di importacion di cuminda. Finalmente, e ta resumí su resultadonan riba e impakto potencial.

IMPACTO AUTOMOTRIZ DI ARUBA NA 2023

Na 2023, Aruba a importa un total di Afl. 2.750 miyon na mercancia for di exterior. Mitar di e productonan ey a wordo importa for di Merca mientras cu solamente 5 porciento a wordo importa for di China. Mercancia importa for di China of Mexico y Canada, e otro paisnan cu Trump ta dirigi riba dje, directamente of indirectamente no mester wordo afect pa e tarifanan propone, ya cu nan no ta drenta Merca caminda e tarifanan ta wordo impone.

CUA PRODUCTO TA AFECTA

E tiponan di producto cu por wordo afecta pa e tarifanan ta productonan cu ta usa materia prima importa pa Merca pa fabrica un producto final na Merca. E prome tipo di biennan cu mester wordo destaca, ta vehiculonan di motor. Na 2023, 30 porciento di tur vehiculo a wordo importa for di Merca (Afl. 65.9 miyon). Vehiculonan ensambla na Merca ta usa tanto metal como piesanan di China y Mexico indicando un aumento den gastunan si impone tarifanan. Loke por concretisa ta un substitucion di importacion pa Aruba riba vehiculonan como reaccion riba e aumento di e gastonan di vehiculonan Mericano. E ora ey e efectonan riba economia di Aruba ta limita como un vehiculo como un medio di transporte na su base ta substituibel. Un KIA y un Ford, por ehempel, ta provee ​​e mesun transporte. E diferencia ta e preferencia y potencialmente e luho mara na e tiponan di auto. Pa lesa e analysis completo di departamento di economia, click AKI.