Entrante 8 di juli 2015 e tarifa di BAZV ta 2%

ORANJESTAD – Departamento di Impuesto ta informa cu entrante 8 di juli 2015 lo drenta na vigor un cambio den e ley di belasting yama ‘Ordenansa nacional di belasting destina pa AZV’ (Landsverordening bestemmingsheffing AZV) en corto ‘BAZV’. E cambio di ley ta encera cu e actual tarifa di 1% ta bira 2%. Manera conoci, e empresarionan ta esnan cu tin cu paga BAZV na Departamento di Impuesto.

TENE CUENTA

Ta importante pa e clientenan aki tene cuenta cu e tarifa nobo di 2% na momento di haci declaracion y pago di BAZV di e luna di juli, na augustus proximo. En conexion cu e cambio di tarifa di BAZV, ta necesario tambe pa haci cambio den e formulario di declaracion. Actualmente Departamento di Impuesto ta haciendo e preparacionnan necesario y dentro di poco e comerciantenan lo ricibi e pakete cu e formularionan nobo valido pa e periodo di juli te cu december 2015.

LEY A PASA

Diabierna atardi parlamento di Aruba a vota cu 11 voto pro y 5 contra, y pasa e ley pa aumenta BAZV (Health Tax) cu 1%. Tratamento di e cambio di ley di BAZV (Health Tax) a cuminsa for di awe mainta den parlamento. E intencion tabata pa na final di e reunion, parlamento aproba un aumento di e impuesto cu 1%, conforme e mocion di fraccion di AVP durante tratamento di presupuesto 2015 recientemente. E aumento tin cu percura pa un extra entrada den caha di gobierno. No tabatin ningun mocion y/of amienda cu mester a vota pe. E ley ta drenta na vigor, entrante 7 di july proximo.

LAAT

E ley mester a keda introduci 1 di juli ultimo, pero mirando cu no a keda cla cu esaki, a bin dilanti pues pa haci esaki awor entrante awe. Mes momento parlamento a aproba e mocion di fraccion berde, pa reduci e prima di AZV cu 1% pa asina e no cay asina pisa pa e comunidad.

MEP

Fraccion di MEP a cuminsa na protesta awe mainta, indicando cu netamente loke cu e fraccion berde a ‘grita’ na 2006 di lo no haci, y cu promesa pa campaña 2013, nan lo a elimina BBO den dos parti, prome cu 1 ½ y sigui pa e otro 1 ½. Algo cu despues a resulta cu no tabata viable mas.

SUAVISA

Sinembargo, awe cosnan ta diferente y awor a resulta cu mester aumenta esaki toch. Aunke cu e partido ta sigura cu banda di esaki, ta tuma otro medida pa ‘suavisa’ e sla.

CFT

Mes momento, College Financieel Toezicht (CFT) a mustra cu mirando cu e implementacion tabata cana laat, pa cada dia cu esaki no ta implementa, e lo causa perdida den caha di gobierno. Como tal a recomenda pa aumenta esaki aun mas cu .5%. Algo cu sinembargo no a conta cu aprobacion di parlamento y/of gobierbo di Aruba. Foto cortesia ArubaAriba.com