Sevinger: Mi no por acepta cu mi lo a ricibi 900 mil (florin) ilegalmente segun OM

ORANJESTAD – Mi ta haci trabou aki aya. Mi no por acepta cu mi lo a ricibi 900 mil (florin) ilegal. Mi no tin bista, no sa kico mi ta bay haci. Si mi ta bay prizon, si mi ta bay Hulanda pa haya trabou, kico ta pasa cu mi famia”. Un Benny Sevinger kibra y na yoramento, a splica huez diabierna mainta cu e ta un homber kibra. 

SITUACION ACTUAL DI SEVINGER 

Durante tratamento di e caso di expropiacion diabierna mainta, y despues atrobe na final, huez a puntra Sevinger riba su situacion actual. Aki ta unda cu e la kibra y yora. “Awor mi ta desemplea. Cos ta hopi dificil” Sevinger a bisa cu awa na wowo. “Mi ta pensa di con mi situacion tabata prome cu mi a drenta politica y awo. Total di 16 aña parlamentario, 8 aña minister. Awor nan kier bende mi cas, nan a kibrami. Mi ta puntra mi mes si tabata bale la pena” Sevinger a sigui bisa, refiriendo na su tempo como politico. E la bisa cu prome cu politica, e tabatin un bon trabou, tabata gana mucho mas miho cu ora cu e la drenta politica, y mira unda e ta awe.  “Mi no tin bista riba un futuro desde 2017. Ainda mi ta den casacion, awor tambe cu e ontnemings zaak (expropiacion). Mi ta den limbo”, e ex mandatario a bisa den un forma emocional. 

MAS EMOCIONAL

Sevinger a bira mas emocional, y cu ne, su yiu muhe, actual parlamentario Stephany Sevinger cu tambe tabata den corte, cu tambe no por a contene su emocion. Esaki tabata ora cu huez a puntra Sevinger, con e yega na placa awor. “Mi ta traha cashi, aki aya, ta haci trabou di verf. Loke mester pa mi por sobrevivi”. Ora cu e la menciona esey y e parti cu hasta su yiu muher ta yude cu paga su hipoteca di cas, e y su yiu a bira emocional y awa tabata basha di nan wowonan. 

OVERBRUGGINGS TOELAGE?

Loke a hala atencion tabata cu durante cu e tratamento di e caso, specificamente ora cu huez a confronta Sevinger cu su situacion di placa, ningun momento e la bisa huez cu como ex parlamentario, e tin derecho di e asina yama ‘overbruggings toelage’, y cu e tambe ta un di esnan cu a haya esaki despues cu e la bandona Parlamento na januari ultimo. E suma ta entre 70 y 80% di e salario cu e tabata ricibi como parlamentario cu actualmente ta AWG 12.550, cu ta bira e ora AWG 10.040, pa luna cu e lo ricibi pa periodo di un aña. Pues, e la omiti e detaye aki, durante e caso, cu por tabata un strategia cu nan a usa durante e caso. 

PERSECUCION POLITICO 

“Unico cos cu mi por mira, ta puro motibo politico. Bo por bisa kico bo kier. Esaki ta un persecusion politico di ora cu dos politico a entrega keho” Sevinger a sigui bisa. “Si mi a haci algo, mi tin cu bay prizon. Pero mi no a haci nada!” Sevinger a sigui bisa . “ Mi lo sigui bringa pa husticia” e ex mandatario a finalisa bisando.