Caminata silencioso emocional pa Mitch Henriquez na Aruba

ORANJESTAD - Un grupo inicialmente di 70 y pico hende a bin ricibi e famia di defunto Mitch Henriquez na aeropuerto diamars atardi. E yegada di e famia y e curpa di e defunto, tabata hopi anticipa. Atencion di prensa tambe tabata grandi, manera por a spera. Esnan presente mesora a cuminsa cu e caminata silencioso, for di e tereno di aerocargo na aeropuerto, te na e funerario Aurora Funeral Home na altura di Cumana. Escolta pa polis, e mama , visiblemente kibra-, y e ruman a lidera e caminata, pero den un auto cora. Na yegada na e funeraria, e grupo a crece y a tabatin un 30 persona mas wardando riba e grupo. Na yegada, e ruman muher Lila a hiba palabra, gradiciendo tur esnan presente pa e sosten na Hulanda y Aruba. "Pa nos aworaki, e prioridad aworaki ta dera mi ruman" Henriquez a bisa. "Despues nos lo cana pa busca husticia. Esey ta bira e proximo paso. Pero e prome paso ta pa nos dere" Henriquez a sigui bisa. A pidi tambe un sosten pa duna famia respet pa por 'verwerk' e perdida grandi aki, den tur privacidad. Mas despues, Henriquez a reitera e tristesa. "Hopi duro" Henriquez a bisa NoticiaCla.com. "Nos kier tuma momento cu'ne, pa nos ta cunele (Mitch). Pa loke ta e mama, Henriquez a confirma e mirada di tristesa. "E ta hopi kibra. E tabata un noticia terible pa nos" Henriquez a sigui bisa. Notable tabata e presencia di e representacion di Hulanda na Aruba, den persona di sra Tanja Timmermans y e vocero, y tambe parti di fraccion di partido MEP, lidera pa e lider Evelyn Wever Croes. "Nos a bin demonstra na e famia cu esaki enberdad ta un suseso hopi tristo. Nos ta convivi e momentonan cu nan" Timmermans a bisa. Lider di MEP, tabata satisfecho cu e grupo cu a bin. "Chikito pero importante. E tabata bon representa" Wever a bisa di esnan cu a participa na e caminata. Diaranson anochi tin chens pa condoleer, sigui pa e entierro mes cu ta diahuebs atardi.