Kock: No por trata caso di expropiacion sin un sentencia final den caso Avestruz

ORANJESTAD – Corte no por trata caso di expropiacion di cliente Benny Sevinger, te ora cu tin sentencia final den caso Avestruz. Esaki tabata e argumento principal di e abogado David Kock den e caso di expropiacion diabierna mainta.  Ex parlamentario  Sevinger tabata den corte atrobe, e biaha aki pa bringa su caso di expropiacion. Ministerio Publico ta acusa e sospechoso di e caso Avestruz, di a enrikese su mes ilegamente cu casi un miyon florin tempo cu e tabata minister y kier pa e paga pais Aruba e placa aki bek. Su abogado David Kock a bringa esaki argumentando cu mientras cu su cliente oficialmente no a exhausta tur vehiculo legal pa proba su inosencia den e caso Avestruz, e caso aki mester warda of mester expulsa esaki. E suma cu ta den disputa, ta entre 900.000 pa 940.000. florin di cual casi 100 mil ta di pasashi y otro asuntonan, y e resto ta placa cu lo a usa pa e cas di Sevinger, basa riba un supuesto ‘taxatie rapport’.  

HUEZ

Huez durante e caso, a mustra cu ta trata di dos punto cardinal, unda cu 1. Mester por confirma cu Sevinger a haci gasto cu e no por a declara, y 2. Si tabatin gastonan cu tabatin haberi cu actonan ilegal. Segun Huez, Sevinger ta refuta tur esaki y esey ta e discusion actual. Sevinger, segun Huez, ta sigura cu e por proba tur e gastonan haci. 

BAY BIN 

Contrario na casonan unda cu ta presenta tur informacion den corte pa prome biaha, y abogado ta presenta un defensa ‘inicial’, esaki tabata un continuacion di un caso cu a cuminsa for di aña pasa, y unda cu tabatin varios documentacion cu a cruza otro entre OM y e defensa y huez. Diabierna, a djis usa pa haci preguntanan specifico y clarifica algun duda cu tabatin. 

PREGUNTA DI HUEZ

Huez a inicia e session cu pregunta riba e gastonan haci pa cu e cas di Sevinger. Cifranan cu no ta cuadra cu otro, y cu e tabata kier claridad ariba. Sevinger a sigura cu e mes, como architecto, a haci un calculacion di esaki, y presente pa autoridad. Pero un rapport di expertonan financiero lo tabata mustra otro cifra. Y e cuestionamento ta debi cu huez tin informacion cu e tipo di trabou cu Sevinger tabatin y e forma di biba pa e trabou, tabata asina exhausto, cu e no tabata keda cu tempo pa e mes traha riba e cas, manera cu e ta alega. Y ta aki ta unda cu e huez kier a haya claridad.

PLACA

Un di e puntonan di duda, tabata e ingresonan (entrada) di Sevinger, cu e tabata of a haya, sin cu tabatin declaracion pe. A haci mencion di un hipoteca di banco cu e la haya di casi 100 mil florin, y tambe placa di benta di un cas di su mayornan, y entrada di benta accionan di e compania SHS. Y ademas, e placa cu e la ‘spaar’ di su daggeld vergoeding’ (check otro articulo). Huez a scucha partidonan y ta dicta un sentencia dia 3 di April den ora di mainta.