Corte: Sevinger tabata spaar ‘daggeld vergoeding’ pa paga pa renobacion di su cas

ORANJESTAD – Benny Sevinger durante cu e tabata minister y tabata biaha, tabata spaar su daggeld vergoeding y usa esaki pa paga pa trabou riba su cas. Asina e la splica den corte diabierna mainta durante tratamento di e caso di expropiacion, relaciona cu e caso Avestruz. E ta un tema cu semper ta(bata) bin dilanti, cu ta e tema di daggeld vergoeding, esta compensacion pa dia ora cu un gobernante biaha y kico e ta haci cu esaki. Esaki pasobra hopi tabata wordo tilda di ta ‘abusa’ y usa e placa pa probecho personal, durante nan biahe envez di usa esaki manera mester y of debolbe esaki si no a use. Den e caso diabierna mainta contra ex minister Benny Sevinger, a bin sali na cla cu Sevinger, envez di usa e placa, tabata spaar esaki, y asina yuda paga pa su cas, y e resto of e demas, e tabata warda pa e siguiente biahe. 

BIAHA HOPI

E sumanan cu e lo a logra ‘spaar’ ta hopi, mirando cu e tabatin hopi dienstreis, esta biahe di trabou. E compensacion financiero pa dia (daggeld vergoeding) menciona, tabata di 300 dollar pa dia (e ta varia depende unda bay y den ki moneda ta pag e ora:red) , cu cual e lo mester a cubri su gastonan di biahe. Algo cu tabata facil pasobra te cu 2014, e ministernan tabata haya e placa cash, y despues di 2014, a cuminsa deposita esaki riba cuenta. Sevinger a splica cu gran parti di esaki, e la ‘spaar’ y yuda paga su cas cu ne. Ta papia di suma cuantioso di centenares di miles di florin. Huez a puntra Sevinger, si e tabata spaar esaki, con e tabata cubri e gastonan e ora. Segun Sevinger, como minister, e tabata haya mayoria cos cubri, manera transporte, cuminda, y mucho mas. Como tal, no tabatin necesidad pa usa e daggeld vergoeding y e tabata ‘spaar’ esaki. E tabata usa su credit card pa haci e pagonan necesario. “Sr Huez, ora di bay hotel, nan no ta acepta placa cash sino credit card” e la splica e huez. Huez a mustre riba un potret presenta como prueba, di un lugar cu e huez mes a reconoce. “Mi mes por wak cu ta Venetia. Aki tambe bo a usa credit card?. Sevinger a mustra huez cu aki e la usa placa cash y ta corda esaki bon bon pasobra ta e icecream mas caro cu e la yega di paga p’e den su bida. “Mi a paga 40 euro pa dos ijscream” Sevinger ta corda. Segun e ex mandatario a splica, e tabata sinta na un café, y nan a exigie pa e cumpra algo, sino e no por sinta eynan. Y e ora e la dicidi pa cumpra dos ijscream. Huez a puntra Sevinger e ora si esey tabata placa di daggeld of no. E no tabata corda, pero a bisa si, cu semper e tabatin placa cash cu ne si. Cuanto, e no ta corda y no tabata administra esey asina. 

MINISTERIO PUBLICO

Como reaccion riba su splicacion di dag geld, y spaarmento. Segun e fiscal, no por spaar asina. ‘Cos no ta funciona asina’. Ora cu un persona usa cash asina, mester tin registracion tambe pa por separa tur cos, segun e fiscal. Algo cu Sevinger lo no a haci, cu ta hink’e den problema awor.