ELMAR: Si lona di tent di carnaval (kavel) alcansa liña di coriente, consecuencia por ta grave!

ORANJESTAD – Si lona di tent cu ta ubica riba e ruta di carnaval na Playa, como kavel, mishi cu e liña di coriente, esaki por tin consecuencia grave. Asina e compania di electricidad, Elmar a informa diaranson. Mirando e seriendad, pesey ELMAR a pidi atencion di tur esnan cu tin tent riba ruta di carnaval; no mishi cu e tent ni e lona of tarpolin den caso cu esaki bula y alcansa liñanan aereo di coriente. 

BIENTO FUERTE

Segun Departamento Meteorologico, nos ta den un siman di biento fuerte te duro den rafaga (wind knots). Esaki ta un peticion importante pa preveni peliger pa bida di hende.  A compronde cu si caso e lona yega e liña di coriente ariba, e por causa interupcion di coriente. Pa evita esaki, ELMAR a bin cu tips pa evita esaki.

-        Instala bo tent na un manera stabiel pa evita cu e lona of tarpolin di e tent bula y alcansa liñanan di coriente.

-        Ora bo bandona e sitio, kita e lona of tarpolin di e tent pa baha e riesgo di peliger.

-        Si e lona of tarpolin di tent alcansa liñanan di coriente, no mishi cu e tent ni e lona of tarpolin, esaki por pone bida di hende na peliger. 

ASISTENCIA 

Pa garantisa un carnaval sigur pa tur hende, ta crucial pa cumpli cu e reglanan aki. Si mester asistencia, por fabor tuma contacto cu ELMAR su Storingsdienst na 523-7147.