InselAir Aruba a inaugura su buelo pa Medellin Colombia

MEDELLIN – Despues cu InselAir international tabata ehecuta buelonan directo pa Medellin, Colombia for di Corsou, InselAir Aruba desde dialuna 6 di juli tambe ta bula e ruta directo aki. Segun e CEO di InselAir Aruba, Frederick Nuboer, e no tabata facil. Un aña di preparacion esaki a tuma pa e buelo aki bira realidad. Cu 2 buelo semanal pa Medellin, InselAir a mas bien consolida e mercado ya existente (via Corsou prome) y pone buelo directo pa e satifaccion di e biahero arubiano cu conoce e ruta aki caba.  

PREMIO MEDELLIN

Segun Nuboer, Medellin no ta un pais desconoci, y te hasta recientemente a gana un premio como un di e ciudadnan mas inovativo di Latino America (number 3). Pa e turismo medicinal, Medellin ta hopi conoci serca nos arubianonan. “Tin hopi motibo pa bula pa Medellin for di Aruba” Nuboer a sigura e website aki, y tambe pa otro destinacionan dentro di Colombia, cu InselAir ta bulando. “Kiermen e ta sirbi di dos manera”.

DIFICIL

Facil e no tabata segun Nuboer. “E autoridadnan ta rekeri hopi rekisito, documentacion, training ,prueba. Pero tambe e aeropuerto unda cu bo ta bula. A caba di haci un buelo siman pasa pa Medellin pa e prome buelo di test, anto na e rampa caba nan a bisa nos cu nos ta bay haya un audit, un chekeo. Y tur cos a bay bon” Nuboer a sigui bisa. E tabata un proceso hopi largo. Sigur un aña y mei prome cu a termina cu tur e rekisitonan cu a wordo pidi. Naturalmente ta keda na e pais pa exigi pa e compania cu ta opera, haci esaki di un nivel halto di siguridad. “Nos ta aplaudi esey semper” Nuboer a bisa.

FRECUENCIA

E frecuencia di buelo lo ta 2 biaha pa siman, pa Medellin. Tur dialuna y diahuebs. Pero tambe ta ofrece e pasaheronan coneccionan via Corsou, tur diamars y tur diabierna. Esey ta hacie posibel pa e pasahero tin mas flexibilidad. E intencion ta pa si e ruta sigui crece, pa InselAir añadi mas frecuencia.

I