Minister venezolano na Aruba pa atende e detencion di “El Pollo” Carvajal

ORANJESTAD – E detencion di e diplomatico Hugo “El Pollo” Carvajal di diaranson anochi, ta wordo atendi riba nivel diplomatico halto na Aruba. NoticiaCla mientrastanto a haya confirmacion cu diahuebs mainta tempran un vice minister venezolano a yega Aruba pa pone su mes na altura di e situacion. Mes momento ta sperando mas diplomatico halto den curso di dia na Aruba. E intencion ta pa tin un reunion cu gobierno di Aruba, riba e caso aki.

Manera cu NoticiaCla a raporta inicialmente,despues cu autoridad a pone man riba Carvajal diaranson anochi, e intencion tabata pa sake for di Aruba diahuebs mes, y extradite pa Merca. Sinembargo awo ta resulta cu e peticion di extradicion no a drenta ainda y como tal no por haci nada. Loke si a drenta ta e orden pa aresto temporal, cu a drenta directamente via State Department mericano. Esey a keda confirma tambe pa vocero di Ministerio Publico, Ann Angela.

Vocero di Ministerio Publico Ann Angela a confirma na NoticiaCla, cu e detencion di Carvajal diaranson anochi na Aruba tabata riba peticion di autoridad mericano. Esaki ta a base di un caso cu nan ta sospecha cu e ta meti aden. Aunke cu Angela no kier a confirma esaki, NoticiaCla di otro fuente a compronde cu ta trata di un cargo di droga. Pa loke ta su status, Angela a confirma cu aunke cu Carvajal tin un status diplomatico, e no ta nombra den funcion y como tal e no ta goza di inmunidad politico. Esey a pone cu nan por a detene sin problema.

Mientras cu e intencion ta pa extradita Carvajal pa Merca mas lihe cu ta posibel, tanten cu no tin un peticion, esaki no por cuminsa cana su caminda. “Merca tin 60 dia pa haci esaki” Angela a confirma na NoticiaCla. Si e bringa e extradicion, e lo tuma tempo, y si e coopera, e extradicion por tuma lugar mesora. Esey a sosode den un caso anterior unda cu e persona deteni (un canades) a coopera y nan a sake mesora for di Aruba. Angela no por a confirma cu e peticion di extradicion a drenta caba. Carvajal lo wordo presenta dilanti PG den curso di dia diahuebs y diabierna esaki lo sosode dilanti di Hues Comisario. Eynan su detencion tin cu wordo evalua, pa wak si e la sosode segun ley.