Hepple: Porfin tin oido pa recibonan halto di coriente di hotel

ORANJESTAD – Gobierno porfin a priminti e asosacion hotelero di Aruba, Aruba Hotel And Tourism Association (AHATA) pa regla e asunto di recibo di coriente halto. Por lo menos, esey ta loke cu minister di turismo Otmar Oduber a priminti e CEO di AHATA Jim Hepple. “Nos a papia cu e minister algun dia pasa, y e la priminti di papia cu Elmar. Pues nos ta hopi contento cu esaki” Hepple a confia na NoticiaCla.com dialuna. Cu esaki tambe AHATA ta sali for di un impasse cu gobierno riba e tema fastioso. Un reunion planea cu minister di utilidad Mike de Meza diaranson awor, mester trece mas claridad riba e asunto.

PROMESA NO CUMPLI

Algun luna pasa Hepple a bisa e mesun website aki, cu nan tabata fada, di wordo hiba di kashi pa muraya. Cos a bira asina fastioso cu AHATA a duna gobierno te ‘zomer’ aki, pa ‘resolve e asunto, of wanta e consecuencianan’. E tempo ey Hepple no kier a bisa kico e ‘consecuencianan ey tabata’. Hepple ta spera cu gobierno cumpli awor si y cu AHATA haya exactamente loke nan a wordo priminti, esta un cambio di forma di calcula e uso di electricidad pa e hotelnan.

CALCULACION DI CORIENTE

Te cu awor, e forma di calcula e uso di coriente, ta basa riba ‘capacidad instala’, esta ta cobra segun e loke e hotel ta ‘suppose di produci’, enbes di cobra loke realmente e hotel ta gasta na coriente. Esey ta nifica cu si e hotel tin un ocupacion abou, of ta usa menos, esaki no ta traduci den menos placa riba e recibo fin di luna. Algo cu hotelnan ta sumamente disgusta y no content cune.

PERIODO FIHO

Den pasado gobierno a haci promesanan na AHATA pa resolve e asunto, pero nada nunca no a wordo haci. Y esey tabatin e asosacion hopi disgusta. Hopi promesa pero nada di cumplimento. “Ohala esaki wordo resolve pronto” Hepple a bisa. Mientras cu Oduber no a duna ningun fecha of periodo fiho cu e asunto lo wordo regla, AHATA su CEO a simplemente bisa cu ‘nan ta hopi serio riba e asunto aki’.

REVPAR DEVELOPMENT

Aña pasa hunto cu gobierno, e hotelnan a drenta den un asina yama ‘revpar development plan (rev par= entrada pa camber disponibel di hotel), y un di e puntonan crucial, tabata e gasto pa haci negoshi. “E mester keda atractivo pa nos por sigui inverti y bay tras di e cliente di nivel halto”. Y pa logra esaki, mester a atende cu e problema di recibo di coriente halto prome”. Y Hepple ta contento cu cos ta moviendo. No solamente e asunto di coriente, pero tambe otro asunto pendiente.