Szabó: No tin sancion mara na carta pa Aruba entrega presupuesto fin di maart

DEN HAAG – Contrario na informacion di prome minister Wever-Croes diabierna mainta, Hulanda no ta considera e carta di RMR pa Aruba pa keda cla cu e presupuesto pa fin di maart proximo como un ultimatum (of deadline:red) . “Wel, e no ta un ultimatum. Asina mi no ta wak e.  E ta un carta cu ta bay den direccion di Aruba, cu e pregunta riba base di CAFt pa wak si por entreg’e (e presupuesto:red) na tempo” Szabó a bisa. Riba esaki, e periodista di Noticiacla Tito Laclé a puntra si no cumpli cu e fecha, si esaki ta nifica sancion, den p.e. forma di un aanwijzing (instruccion). “No tin sancion mara na dje. Esey si mi por bisabo” Szabó a sigura e periodista. Esaki riba su mes ta straño, si a pone un fecha pa e entrega cu ta 31 di maart 2025, y cu e mandatario Hulandes no ta considera esaki un ultimatum of deadline. 

UN CARTA SIN SANCION

E ora a puntra e mandatario Hulandes, ki efecto por tin riba un carta asina den direccion di Aruba, sin cu e ta mara na un sanccion. Normalmente ora cu bo manda un carta asina, tin consecuencia mara na dje ora cu no tin cumplimento. Pero den e caso aki, e mandatario ta simplemente confia cu Aruba lo cumpli cu e palabracionan haci. Di experiencia, por bisa si, cu Hulanda ta zona semper positivo, pero ora cu cos yega y pega, rapidamente ta sigui un tipo di sancion como consecuencia. Aunke cu nan no ta bisa esaki explicitamente awor.  Por scucha e entrevista AKI.