AHATA ta opone contra restriccion proponi riba permiso hotel

Posted on 7/7/2015, 12:11 AM AST | Updated on 7/7/2015, 12:14 AM AST

ORANJESTAD - AHATA ta opone fuertemente contra e restriccionnan proponi riba permiso di hotel. Representantenan di e hotel- y resortnan di Aruba, (Aruba Hotel & Tourism Association, AHATA) a bin ta reuni cu Ministro di Turismo Otmar, pa discuti e plan di gobierno pa introduci restriccion riba e forma cu e hotelnan por opera, como intento pa paralisa mas expansion di acomodacion cu tur cos inclui (all inclusive).

REUNION DIABIERNA

AHATA a reuni cu Ministro diabierna dia 3 di juli atrobe pa discuti e asunto. AHATA a trece su oposicion contra e cambionan proponi fuertemente padilanti pa tres rason importante:

?       Esaki lo cambia e caracter di un permiso di hotel existente,

?       Esaki lo restringi e aptitud di e hotelnan pa ahusta nan mes na e forsanan di mercado continuamente cambiante na un manera oportuno,

?       Esaki lo tin un impacto tremendamente negativo riba confiansa di e inversionistanan, pa motibo cu e lo tin un impacto directo riba balor di nan propiedadnan.

MODELO COMERCIAL

AHATA a trece claramanete padilanti cu e modelo comercial cu ta existi actualmente, den cua e hotel- y resortnan por adapta rapidamente y efectivamente na e demanda continuamente cambiante, a mustra di ta extremamente exitoso pa Aruba. AHATA a señala cu durante e ultimo cinco añanan Aruba a conoce un aumento excepcional den e cantidad di bishitante, surpasando grandemente e tasanan di crecemento global y regional, y cu e ingreso promedio pa camber disponibel, cual ta un fuerte indicado di bishitante cada bes mas rico, a sigui crece cada aña for di 2009.

AHATA a manifesta cu tanto sector priva como sector publico a bay conhuntamente di acuerdo cu e strategia pa futuro desaroyo di turismo di Aruba ta di atrae mas poder adkisitivo, mas bishitante cada bes mas rico y cu, den esencia, esaki ta nifica limitacion estricto di mas expansion di camber hunto cu inversion significativo den e producto existente, pa mehora su calidad constantemente. Simplemente bisa, esaki ta nifica: bay pa calidad en bes di cantidad.

PLAN CONHUNTO

Na aña 2014 a prepara un plan conhunto di sector publico y sector priva cu tabata specifica e programanan y accionnan necesario pa aumenta ingreso di acomodacion pa camber disponibel na Aruba cu 9% pa aña durante e siguiente tres añanan. AHATA firmemente ta kere cu aworaki ta necesario pa implementa e plan ey y cu, haciendo esey, esaki lo incrementa demanda pa propiedadnan cu Plan Europeo (EP) y reduci e necesidad pa e propiedadnan ey ofrece un producto cu tur cos inclui (all inclusive). Hotel cu Plan Europeo ta hotel cu ta cobra solamente pa e camber sin cuminda inclui. E huespednan mes por dididi e ora ey cuanto nan kier paga pa tur nan cumindanan y bebidanan y si nan kier come na hotel of no.

DI ‘EP’ PA ‘ALL INCLUSIVE

AHATA a reconoce cu tabatin interes reciente pa converti hotel cu tradicionalmente tin un Plan Europeo (EP) den resort cu tur cos inclui (all-inclusive). A señala cu un rason primordial pa esey tabata cu e gastonan pa haci negoshi cu continuamente ta aumenta, a haci mas dificil y menos atractivo pa opera hotel cu Plan Europeo y cu tabatin mester di incentivo pa yuda e propiedadnan tradicional aki genera suficiente fondo pa haci e perfeccionamento continuo necesario den e calidad di nan producto posibel.

E plan di mehoramento aki di ingreso pa camber disponibel no solamente ta pidi pa e programanan di mercadeo di Autoridad di Turismo di Aruba (ATA) ta enfoca mas claramente riba atraccion di bishitante cada bes mas rico, sino ta urgi sector priva pa sigui inverti sumanan substancial di placa den mehoramento y perfeccionamento di e calidad di nan hotel- y resortnan. E sector aki a inverti mas di 100 miyon dollar den e mehoramentonan ey den e ultimo 24 lunanan.

AHATA a manifesta claramente, sinembargo, cu e plan aki por ta exitoso solamente si e inversionistanan y e propietarionan tin e siguransa cu e reglanan lo keda mescos.

MENASA DI CLIMA DI INVERSION

AHATA a bisa Ministro cu si e clima di inversion aki keda menasa door di tal cambionan den e restriccionnan, henter e strategia di atrae bishitante cada bes mas rico basa riba un producto di calidad mas halto lo colapsa. A señala cu tin hopi otro luga mas den nos region deseoso pa ricibi placa di inversion, siendo Cuba un ehempel particular, y cu si Aruba mester perde su atractividad como luga pa inverti, e consecuencianan lo por ta masha serio. AHATA a expresa su preocupacion tambe cu tal interferencia di Gobierno den e forma con cualke negoshi mester opera, por plama masha lihe den comunidad.

NECESIDAD PA BALANSA

AHATA ta extremamente consciente di e necesidad pa ofrece un producto balansa, en bista cu tin hopi peliger ora bo ta dependiente di un solo tipo di negoshi. P’esey AHATA ta kere cu tanto ATA como e hotelnan mes mester haci tur esfuerso pa atrae bishitante cada bes mas rico, particularmente di e negoshi di grupo y di incentivo.

STRATEGIA DI 4 PUNTO

AHATA a splica Ministro cu nan ta kere cu un strategia di cuater punta di lansa lo ta esun mas efectivo pa e sector di turismo di Aruba sigui crece:

E hotel- y resortnan di huesped di paso existente mester sigui opera manera nan ta haci actualmente y no mester impone limitacion cu ta regula e forma cu nan ta mercadea nan cambernan. Mester haci tur esfuerso pa intensifica actividadnan di mercadeo dirigi riba atraccion di bishitante cada bes mas rico. Mester implementa e recomendacionnan di e Comision di ingreso pa camber disponibel mas lihe posibel, atrobe cu e obhetivo di atrae bishitante cada bes mas rico, cu ta gasta mas. Mester pone un pakete di incentivo na disposicion di e sector, particularmente e sector di hotel cu EP, di acuerdo cu e recomendacionnan di e Comision di ingreso pa camber disponibel, pa purba contraresta e retonan di sostenibilidad financiero cu e sector ey ta confronta.