Kowloon Restaurant ta celebra 40 aña di servicio

ORANJESTAD - Cu orguyo Aruba ta celebra den luna di Juli, hunto cu Kowloon Restaurant, 40 aña di servicio, 40 aña di e tremendo menu y consistencia cu cada Arubiano a yega di introduci den su hogar. Na aña 1975 Neto Arends a dicidi di inicia cu un concepto na unda ta introduci un menu cu lo pega y cu lo forma e base di entretenimento pa mas di un famia. Neto Arends a uni forsa e tempo ey cu un socio y a establece Kowloon Restaurant. Un establecimento yamativo den colornan expresivo di un servicio unico. Y en berdad el a resulta di ta un luga pa mas di un famia bini hunto. Y sin mas e la bira e restaurant pa topa di masha hopi di nos hendenan pero tambe di e turista cu ta bolbe Aruba cada bes y bishita loke nan ta considera e miho restaurant Chines di Aruba.

MENU

Tur esunnan cu a considera nan mes fiel cliente a brasa e menu, e concepto y e manera indiscutibel di cushina. Kowloon Restaurant a crece y a bira e luga cu famianan ta reuni despues di un parada di Carnaval, un dia di fiesta pa brunch, un diadomingo despues di misa y atardi den famia. Y te dia di awe e famianan ta pasa e tradicion di mama pa yiu y pa nietonan, di famia pa amistad, di colega pa conoci. Caranan conoci a forma semper e servicio, personal cu te dia di awe ta fiel na nan concepto, loke nan ta considera nan cas. Menu no a wordo ahusta, e ta mesun cu tabata t’ey 40 aña pasa di mesun sabor y di mesun calidad.

FAMIA ARENDS 

Kowloon Restaurant ta maneha dor di famia Arends y kende na Aruba no conoce Neto, Ludmila, Lisandra y Tirzah cu semper tabata e caranan di Kowloon, pero tambe trahadonan cu tin casi 40 aña di servicio manera Tommy, Frido, Erick, Nick, Rigo y otronan. E empleadonan, cu mas di 30 aña trahando, ta cla pa sigui sirbi e pueblo di Aruba cu algun oferta special pa celebra 40 aña di fiel servicio di e restaurant number un di Aruba y cu semper a keda para manera un baranca a pesar di tur reto den economia di nos pais.

PREMIO

En conexion cu celebracion di nan 40 aña, Kowloon Restaurant ta ofrece e posibilidad na momento di take away of na momento di disfruta hunto cu bo famia y/o amistadnan un dushi cuminda, pa saca bo potret y pone esaki den un nice photoframe di Kowloon. Publik’e riba Facebook y tag Kowloon aden y esun cu haya mas like por gana Afls. 100,00 na Gift Certificate pa disfruta di un dushi cuminda na Kowloon Restaurant. Tur Dialuna lo saca e ganado cu mas “like” riba su potret. Cada siman tin un menu special cu prijsnan reduci. Bishita e pagina di facebook di Kowloon Restaurant y sigui e actividadnan special durante e luna di fiesta aki. Keda pendiente pa e dia special mes cu ta Juli 28 cu ta e dia exacto cu Kowloon ta celebra su 40 aña di existencia.