Imagen cu Aruba ta e isla mas sigur, afecta pa suceso fatal

ORANJESTAD – E imagen proyecta recientemente cu Aruba ta e isla di mas sigur den Caribe, a caba haya un sla formal. Cu e suseso recien cu a resulta fatal pa un hoben despues di un persecusion cu polis, e discusion di Aruba su imagen sgur, ta den wega. Esaki awor cu e noticia a alcansa rednan internacional di noticia e siman aki. Prensa Hulandes (NOS) ya caba a haci un relato extenso e siman aki, cu e tono cu e relacion entre polis y comunidad ta hopi ‘tenso’. Den un entrevista cu e Alto Comisario di polis, e ta relativa e situacion na e medio hulandes y ta sigura toch cu ‘cos lo drecha’. Esey sinembargo no ta kita afo cu Aruba ta den un luz hopi negativo actualmente, pa loke ta siguridad. Y ora cu medianan internacional cuminsa raporta esaki, e ta yega na futuro bishitante cu ta cuminsa cuestiona nos ‘seguridad’. A compronde cu stakeholdernan internacional a cuminsa 'cuestiona' e situacion actual na Aruba. Ta conoci cu ora cu cosnan negativo sosode riba nos isla cu tin un embergadura asina grandi, instancianan manera oficina di turismo ta mesora haci sondeo cu nan stakeholdernan internacional pa midi e efecto y wak con por 'mengua' cualkier imagen malo cu esaki por crea. E biaha aki no ta conoci di parti di ATA, con esaki a registra. Di otro caminda si, a compronde cu e la lanta preocupacion internacional pa cu nos isla. 

ARUBA ISLA MAS SAFE

Mitar di januari 2025, Aruba a keda apunta como e isla mas sigur den Caribe. Hopi fanfaria a wordo haci rond di e noticia aki y entre nan gobierno di Aruba a plama esaki mas cu e tabata por, comprendiblemente, pa asina tur hende cu porta ainda no a tende, tabata sa sigur di esaki. E la hasta hala atencion na Corsou, unda cu e prome minister di e isla, Gilmar ‘Pik’ Pisas a haci un remarke di jaloezie, cu Aruba ta mas sigur cu Corsou. Y e declaracion aki tabata den pleno campaña, dia di entrega di lista. E la probecha pa usa e momento pa sigura tur hende cu su gobierno lo haci tur cos posibel pa Corsou tuma e posicion aki di Aruba.

DAMAGE CONTROL

Ainda no ta conoci con grandi e efecto ta di e suseso lamentable di siman pasa. Pero cu publicacionan manera cu a sali na tanto Merca como Hulanda, e no ta yuda e imagen di Aruba pa nada. Loke un isla ta tuma decadas pa logra, un suseso asina, den un frega di wowo, por trece tur cos bek pa e.o. e periodo di 2005 y despues, cu e desaparicion y morto di e Mericano Natalee Holloway. Potret cortesia 24ora.com