Diamars formadornan ta entrega lista di ministernan potencial na Gobernador

ORANJESTAD – Diamars mainta pa 11'or ta bira conoci ken tur ta bira minister den e proximo gabinete Eman. Ademas e intencion ta pa comienso di maart 2025, e gabinete nobo ta cla pa traha. Despues di e ultimo reunion cu stakeholders (e biaha aki riba tereno di salud), e formador Eman a confirma cu dialuna anochi, durante partijraad di AVP, lo dicidi e 5 nombernan pa bira minister y esnan cu ta bira parlamentario pa e partido berde y cu e ta premira cu e gabinete completo ta cla pa goberna. Pa respet pa e proceso y pa Gobernador di Aruba, no kier a menciona e nombernan prome. Loke si a bira conoci, ta cu un di e potencial candidatonan, Stephany Sevinger, yiu di ex minister Benny Sevinger a wordo scohi pa ta parlamentario y no minister. Un posicion cu e la acepta y cu e lo traha p’e. Asina e la declara na e portal 24ora.com anochi despues. 

GOBIERNO NOBO

Eman a bisa cu e ta premira cu pa comienso di maart, -e la indica cu esaki por ta 1 di maart caba -, e gobierno nobo por sinta caba. Unabez cu e lista di candidato ‘potencial’ pa minister ta cla, ta pasa esaki pa e proceso di screening. Ta bisa ‘potencial’, pasobra nan tin cu pasa screening, pues ta despues cu pasa screening, ta confirma e nombernan. Ta interesante pa tende di sr Eman cu e ta kere cu e proceso ta cla pa comienso di maart, siendo cu e proceso di screening no a cuminsa ainda. Esaki ta mas rigoroso cu esun di formador, cu riba su mes, a dura 2 pa 3 siman. Y esey kier men cu esun di minister, lo dura sigur mucho mas largo. Noticiacla recientemente den e parti di ‘analisis’, a dileña specificamente kico tur tin cu pasa ainda den e screening, cu ta pone cu ta hopi ambicioso pa pensa cu esaki por ta cla pa comienso di maart, aunke den politica, tur cos ta posibel. E nombernan cu mas sigur ta poni pa bira minister, ta e propio Mike Eman como prome minister, Wendrick Cicilia, Arthur Dowers, Mike de Meza y Mervin Wyatt Ras. Ki cartera e personanan otro cu Eman lo haya, ainda no ta conoci. 

FUTURO

Mientras cu pa AVP, e lista di 5 minister ainda oficialmente no ta conoci, esunan di FUTURO ta practicamente un hecho, unda cu sentido comun ta bisa cu e ta e prome dos nan di e lista, esta number uno y number dos di e lista, Gerlien Croes y Geoffrey Wever. Tambe ta conoci ki cartera Wever lo tin, pero ainda no kico Croes lo tin, fuera di Asuntonan di Reino Hulandes. Oficialmente solamente e lista no ta, pero esey ta un formalidad.