Xander Bogaerts ta bay hunga shortstop pa San Diego Padres

PEORIA  — E pelotero di grandes ligas pa Aruba, Xander Bogaerts ta kedando cla pa cuminsa e temporada nobo di baseball cu su ekipo (ainda) San Diego Padres. E diferencia ta cu e temporada aki e ta ‘bek’ na e posicion di shortstop. Un posicion cu e semper a hunga (cu Boston Red Sox) te ora cu e la yega San Diego dos aña y mei pasa. Eynan e mester a hunga segunda base. Tin hopi rumor circulando cu San Diego kier ‘lag’e bay’, pasobra e ta costa nan mucho placa. E tin un contracto di 11 aña di mas di 250 miyon dollar. Mientrastanto e ta preparando pa inicia su di tres temporada cu San Diego. 

ENTRENA NA ARUBA

Durante e offseason, den November y December e la train pisa na Aruba, coriendo tres pa cuater biaha pa siman, 5, 6 of mas kilometer. E ta sigura cu e la train y core hopi mes. Y esey ta pone cu e la perde por lo menos 10 kilo, cu ta un forma perfecto pa ta fit pa su edad y pa e posicion. “Mi ta sintimi realmente jong, realmente jong” Bogaerst a bisa e siman aki na Merca. Bogaerts ta gana 25 miyon dollar pa aña awor, como parti di e contract di 280 miyon pa 11 aña. E temporada nobo ta inicia dia 27 di maart proximo.