Hulanda kier aumenta impuesto pa buelo pa islanan den Caribe

DEN HAAG – Aunke e lo afecta directamente e cartera di hopi residente di e parti Caribense di Reino, poco te cu awor a uza e consulta di internet cu e ministerio a habri pa haci obhecion contra e impuesto di vuelo mas halto proponi riba vuelonan di largo distancia. Asina e portal hulandes dossierkoninkrijksrelaties.nl ta raporta dialuna. 

MASHA POCO REACCION

Di e mas cu 3.500 respondentenan, solamente algun ta biba riba e islanan a critica. Un solo contribuyente for di Curaçao ta argumenta pa un posicion excepcional pa buelonan entre Hulanda y Caribe: “Tin hopi Hulandes cu ta biba dentro di Reino Hulandes y ta wordo afecta financieramente door di e principio aki. No pensa solamente riba expats, cu nan biahenan hopi biaha ta wordo reembolsa, pero riba studiantenan Caribense cu ta studia na Hulanda. E ora ei bishita di famia lo bira asta mas caro cu nan ta kaba.”

AUMENTO 

E gabinete kier cobra pa vuelonan mas largo cu 2.500 km. for di 1 di januari 2027, un impuesto di 90 euro adicional. E argumento ta cu bulamento tin un efecto negativo riba e clima. E medida mester duna gobierno central alrededor di 250 miyon euro extra. Aparte di e consecuencianan social pa e Hulandesnan Caribense cu famia na Hulanda Europeo y studiantenan, e impuesto di buelo por tin un impacto negativo tambe riba turismo pa e islanan. Samenwerking Caribense Hulandes di Aeropuerto (DCCA) a expresa su obhecionnan na Ministerio di Infrastructura y Maneho di Awa. E organisacion lo tabata den un posicion mucho mas fuerte den e discusionnan si mas hulandes caribense a duna nan opinion via e consulta di internet. Esaki ta posibel te cu dia 25 di februari proximo. NOTA: Informacion cortesia dossierkoninkrijksrelaties.nl