Diahuebs ta dera Mitch Henriquez na Aruba

DEN HAAG – Diahuebs atardi ta dera e arubiano cu a fayece na Hulanda dos siman pasa diasabra ora cu e la keda agredi pa polis. Mientrastanto diamars (mayan) e curpa ta programa pa yega Aruba, unda cu despues di su yegada, (segun avisonan den medionan di comunicacion) lo tin un ‘Caminata di paz y husticia pa Mitch Henriquez’ for di aeropuerto pa e agencia funeraria Aurora na Cumana. NoticiaCla.com no por a confirma si e caminata aki ta conta cu sosten di e famia.  Awe dialuna, tabatin un momento pa famianan cu ta na Hulanda y cu no por biaha, pa nan por dispidi di Mitch. Diasabra ultimo tabatin tambe un marcha silencioso na honor di Mitch, na Hulanda, unda cu por lo menos 300 persona a participa, incluyendo ministernan plenipotenciario di Aruba, Corsou y St Maarten. 

CAMINATA Y CONDOLEER

Segun e aviso cu a keda publica, e caminata ta programa pa 5:15 y ta bisa cu e ta cuminsa for di momento cu e curpa di Mitch Henriquez yega Aruba, y ta bay 'rumbo pa Aurora Funeral Home". E grupo cu ta organisa e caminata aki ta yama nan mes #JusticeForMitchHenriquez. Pa loke ta e momento pa condoleer, esaki por diaranson anochi entre 7-9 na e agencia funeral tambe. 

BISHITA DI ALCALDE

Dialuna atardi alcalde di Den Haag Jozias van Aartsen a haci un bishita na Gabinete di Aruba unda ela keda ricibi pa Minister Plenipotenciario Alfonso Boekhoudt. Alcalde Van Aartsen a bishita Gabinete di Aruba pa firma e registro di condolencia pa Mitch Henriquez. Di e manera aki sr. Van Aartsen a demostra su convivencia cu e famia di Mitch Henriquez. E no tabata presente diasabra durante e marcha di silencio, riba peticion di famia Henriquez mes.

E MARCHA SILENCIOSO 

Centenares di persona a participa diasabra na e ''Marcha Silencioso" na honor di e arubiano Mitch Henriquez, cu un siman pasa a muri a consecuencia di agresion policial, ora cu e la wordo deteni. Nan tabata carga balon y bandera di Aruba. Algun tabatin t-shirt preto cu e lema' Justice for Mitch'. Dilanti di e marcha tabatin un pancarta cu e palabranan 'RIP Mitch, nos ta stimabo'. E marcha  tabata di e station Moerwijk pa Zuiderpark, unda cu Mitch a bira victima di agresion policial. Alcalde Jozias van Aartsen, -riba peticion di famia-, no a participa pasobra e tabatan 'un momento familiar'. Pero minister plenipotenciario Alfonso Boekkhoudt si tabata presente y a dirigi algun palabra na papiamento.