Analisis: Ora bo papia hopi, sin bisa nada.. .

Scirbi pa Tito Lacle

Mi a bisa semper y conseha hende, cu ora cu bo tene un conferencia di prensa, wak pa bo tin tur contesta, y ta conciente cu bo ta habri bo mes pa un sin fin di situacion, cu bo no tur ora por controla. Sino, no tene e conferencia, pasobra e por bira den bo contra y haci e meta aun pio. Y esey ta loke a pasa diahyuebs mainta. Den e caso aki, bo ta tene un conferencia di prensa, bin cu bo cadena hudicial completo, for di minister di husticia, PG, Hefe di Seguridad nacional y Alto Comisario di polis, y bo ta crea un perspectiva cu bo lo haya contesta riba un cantidad di pregunta, ya cu cada departamento ta toca algo diferente di e caso. Pero, manera mi a bisa, percura cu bo tin suficiente material pa papia y contesta, y no aparece solamente pa mustra ‘union’ den e cadena ey. Sin contesta, e conferencia ta perde su peso, y ta haya un tinte contraproductivo, y por crea aun mas pregunta y mas pio, mas rabia cu e pueblo tabatin caba. Awor, bo por pensa, damned if you, damned if you don’t. Si bo no bisa nada, ta malo y bo ta sconde, y si bo bisa algo, e nunca ta suficiente. Mi ta compronde esey tambe. Y esey ta e risico cu bo ta cana. E diferencia ta cu ora mas liher bo confronta pueblo, bo ta mustra e seriedad di e situacion, y cu bo tin tur atencion pa e situacion en cuestion. Por bien ta cu bo no tin tur contesta, pero bo a confronta e pueblo. Tarda 4 dia pa haci esaki, y bin cu cantidad di hende pisa di e departamentonan, ta crea un otro situacion. 'Bo a warda pa bin pasobra awor bo tin informacion, solamente pa mustra cu no tin nada nobo'. 

Diahuebs mainta, ta netamente loke a sosode cu e conferencia yama pa e ‘cadena hudicial’. Hopi lihe tabata bisto cu e conferencia tabatin un caracter mas bien, di ‘trankilisa comunidad, pa loke ta e periodo di carnaval cu ta nos dilanti’. Esaki pasobra despues di e suseso lamentable, unda cu un  hoben a perde su bida na man di dos agente policial, a pone cu e comunidad awor ta sinti un inseguridad, rabia y disgusto pa cu e.o., cuerpo policial y ta sinti nan mes insigur y impotente. Tur ta palabranan cu ta describe e sentimento di e pueblo actualmente. Y tur ta comprendibel. Si e polisnan encuestion a actua corecto of no, dentro di margen di nan trabou como polis of no, un investigacion tin cu conclui y contesta e pregunta aki. 

Pero pa loke ta e conferencia di prensa, ora cu tin asina hopi pregunta, sin cu tin contesta (ainda), y toch bo ta presenta un conferencia di prensa cu asina hopi cabez hudicial, mi ta bolbe ripiti: bo ta crea un expectativa cu por haya contestanan relevante. Pa cuminsa, despues di e conferencia di awe, bo por pensa cu ‘por a tene un conferencia di prensa un dia despues mes, y confronta comunidad’. E contestanan no ta cambia si bo a dune 4 dia despues, y ta mas bien pone bo cuestiona, pakico 4 dia despues. Pakico a tarda? Pakico no a bin dilanti prome. Y tur e tempo, ta duna caminda pa redo, storia ireal y Dios sa kico mas. Y no ta pasobra bo tin falta di experiencia, a warda cu e conferencia pasobra tur esnan den e cadena hudicial, tin suficiente experiencia cu e trabou y e forma di maneha informacion. Consecuentemente, e conferencia loke e la logra awor ta solamente contribui na mas confusion y rabia. Y si bo tene un conferencia cu un meta, (trece trankilidad den comunidad pa e periodo di carnaval), pero sa cu no ta esey ta loke e pueblo (y periodistanan) kier tende of kier sa, bo conferencia di prensa ta perde tur esencia y sentido. Si bo kier trece claridad, sin hopi informacion, saca un comunicado conhunto, y e mensahe ta cla. Bo ta logra mesun cos. 

Un otro punto cu ta cuestionabel, aunke porta comprendibel, ta e forma defensivo di tur instancia, y hasta cu un tono menasante, ‘cu lo actua contra cualkier persona cu tin pensa di actua cu intencion maligno contra polis’. Den un setting asina, esey ta traha solamente contra. Laga mi splica: Ta mas cu logico cu polis no ta tolera menasa. Nunca, ni awo, ni despues. Y ta logico cu tur hende cu dos placa di sinti sa, cu no tur polis ta mescos. Pues, cu esaki den mente, no ta necesario pa bira defensivo y cuminsa menasa cu bo lo actua contra cualkier menasa. Semper polis a sa y lo sa di actua contra cualkier menasa. Esey ta nan trabou. Na Hulandes tin un dicho;” Niet naar de bekende weg vragen”. No bisa lo obvio. Sigur no awor. Tabata suficiente pa manda palabra di convivencia na e famianan di e victima, y tambe eventual na e polisnan envolvi. Pero te ey. Pero algo mas, ta haci bo mensahe, arogante, y mas ofensivo pa e pueblo. A buen entendedor, pocas palabras.