Cadena hudicial a purba trankilisa comunidad sin contesta pregunta

ORANJESTAD – E cadena hudicial diahuebs mainta consistiendo di minister di husticia, Procurador General, Alto Comisario y hefe di seguridad nacional, a purba manda un mensahe conhunto na comunidad relaciona cu e caso lamentable di diadomingo cu a termina cu dos polis tirando y mata un sospechoso di persecucion. E mensahe tabata pa sigura y trankilisa comunidad di Aruba cu e por sinti su mes sigur, y mas pa e temporada di carnaval nos dilanti. Esaki pasobra tin hopi intrankilidad relaciona cu e caso lamentabel di diadomingo ultimo cu a conduci na morto di un hoben, na man di dos agente policial. Manera por a spera, mucho no a wordo logra cu e conferencia, mirando cu e expectativa tabata cu lo a haya cierto contesta riba pregunta relaciona cu e caso. Sinembargo, a usa e momento mas pa e meta di trankilisa comunidad. Algo cu no tabatin mester di un conferencia di prensa asina. 

PREGUNTA SIN CONTESTA

Sinembargo, hopi liher y loke por a spera tambe, a bira notable cu mayoria pregunta di prensa tabata relaciona cu e caso di diadomingo, y cu preguntanan specifico dirigi, pero no a logra haya contesta. Comprendibel cu contestanan tabata hopi vago y pober, pa ‘no daña e investigacion’. Miembronan di prensa a sigui primi y insisti, pero pa mas cu nan a purba, e contestanan tabata decepcionante, tanto di parti di e minister di husticia y Procurador General. 

MAS DUDA CU CLARIDAD

E loke e conferencia a logra, door di esaki, ta cu e la crea mas duda y mas disgusto, pa e forma di contesta pregunta, mirando cu tabata mustra como si fuera tabata ‘evadi’ preguntanan, dunando contestanan vago y no completo. Tur ta comprendibel, mirando e estado di e investigacion. Pero e pregunta e ora tabata, pakico ta duna un conferencia si no por contesta pregunta. Y e conferencia no tabata hopi cla pa mustra su meta, esta cu e tabata mas bien pa sigura e comunidad cu ta percura pa un seguridad sigur pa carnaval y cu e caso lamentable ta wordo investiga. Tur ta cosnan cu pueblo tabata sa caba, y cu no tabata necesario pa tene un conferencia pa bisa esaki, pa mas cu e intencion ta comprendibel.