Chauffeur a manda auto den manifestacion di Munich

MUNICH - Den e ciudad sur di Alemania di Munich, un automobilista a drenta den un manifestacion. Por lo menos 28 persona a resulta herida, di cual dos ta den estado grave.

Segun polis, e chauffeur ta un solicitante di asilo di 24 aña di edad di Afganistan. El a wordo aresta. E homber ta conoci cerca polis y anteriormente a keda detene pa delitonan manera ladronicia den tienda y posesion di droga.

Segun prome minister di Baviera, Markus Söder, ta trata di un atake sospechoso. E incidente ta sosode diez dia prome cu eleccion parlamentario na Alemania, caminda migracion ta un asunto grandi.

E incidente a sosode no mucho leu for di stacion central di Munich. Un manifestacion di Verdi, un di e sindicatonan mas grandi di Alemania, tabata tumando lugar den e zona. "Tin un persona benta riba caya y un hoben a wordo hiba pa polis. Hendenan ta sinta na suela, ta yora y ta tembla," un periodista local a bisa.

Segun un bosero di polis, e perpetrado a core tras di e manifestacion alrededor di 10:30 a.m., a surpasa autonan di polis cu tabata escolta e grupo y despues a core bai den e rabo di e manifestacion.