Hopi actividad atrobe pa re-apertura di refineria Valero

ORANJESTAD – E nombernan di e commission di 5 cu tin cu explora posibel reapertura di refineria Valero, ta conoci. Despues di basta contratiempo, gobierno a nombra 5 persona cu tin cu cumpli cu e mocion di parlamento ,-trata durante tratamento di presupuesto 2015-, aunke no a bisa den cuanto tempo e commission tin pa bin cu un resultado. Valero mientrastanto a confirma na NoticiaCla.com cu tin combersacionan andando entre gobierno y e refineria. Mes momento tin e grupo cu ta yama su mes PARA, cu tambe ta sondeando e posibilidad pa reapertura di e refineria,  y ta maneha pa un secretariado cu ta coordina nan movimentonan.  

NOMBERNAN DI COMISION

E personanan ta hendenan cu experiencia amplio, pero cu no ta wordo paga pa nan trabou, aparte di si mester haci gasto manera biahe y otro tipo. E comision ta consisti di Alvin Koolman, Milton Berlinski, Jan Meinte Postman, Philip de Souza, Frank Hoevertsz, Jacobo Geerman y Hans Sjiem Fat.

EXPERIENCIA DI COMISION

Koolman ta lidera e commission aki, debi na su experiencia. Berlinksi ta esun responsabel pa e parti di inversion, economia y finanzas internacional debi na su conocemento. Postma tin conocemento di e area Centro y Sur America riba e tereno aki. De Souza tabata traha cu Valero y tin hopi experiencia. Hoevertsz ta director di Utilities Aruba y ta e representante di gobierno. Geerman tin conocemento di economia di refineria. Sjiem Fat ta abogado y ta atende cu e asuntonan legal y tabata envolvi den negosacionan anterior.

PARA

Den caso di PARA, rapidamente gritonan politico a cuminsa zona den fin di siman. Lider di fraccion berde Rene Herde, a yama e intento di PARA, como un 'otro instrumento di MEP' esta un intento politico saliendo for di seno di e partido heel, aunke den mesun rosea ta apoya 're-apertura di refineria pero ta sigui busca otro desaroyo pa San Nicolas'. Mesora miembro di e secretariado di PARA, Jaime Falconi, a responde bek riba su pagina di Facebook, mustrando cu 'PARA ta un grupo di ciudadano preocupa pa cu e futuro di nos pais y ta realisa cu un posibel reapertura di e refinaderia lo por tin un impacto positivo pa stabilidad di nos situacion financiero y economico'. Ademas Falconi a sigura cu ' PARA no tin e proposito pa busca confrontacion', alcontrario e miembronan cu ta forma PARA kier yuda crea un ambiente positivo cu tin como meta fomenta un discucion abierto y profesional riba e posibilidad di un reapertura di e refinaderia. PARA mesora a manda invitacion pa un encuentro riba e tema, pa diaranson awor 8 di juli na Teresita Center na San Nicolas.