Na Corsou douane ta contina cu nan accion na waf Nieuwe Haven

WILLEMSTAD - Awe duana ta kontinuá ku nan akshon na Nieuwe Haven. Duana ta eksigí pa haña klaridat kiko ta bai pasa ku un edifisio nobo pa nan. Nan tin 2 aña ta warda riba esaki. Sr. Raymond Margaritha di ABVO a duna di konosé ku ayera mainta trahadónan na Nieuwe Haven a informá nan ku nan no ke sigui traha den estado dje edifisio. Ta dos aña ta bai ku e trahadónan tin keho dje edifisio i te ainda no a haña oido di parti mando di duana ni tampoko minister di finansa. Banda di esaki tambe tin asuntu di gratifikashon ku trahadónan no a haña, i ku nan ta puntra ta kon porta.

Sr. Margaritha a splika ku nan a papia ku maneho di duana kende a bisa ku nan tabata trahando riba un lugá pa por aloká e trahadónan. Te ku ayera tardi sr. Margaritha no a tende nada di mando di duana, ni tampoko mando di duana no a tende nada di parti di minister Silvania. P’esei awe a disidí ku trahadónan lo bai bèk na duana na Nieuwe Haven pa por sa kiko ta bai pasa ku edifisionan di duana. E edifisio di Nieuwe Haven tin yen di defisiensia manera entre otro awa ta lèk, “schimmel”, murayanan ku ta kibra etc. “Trahadónan ta mira ku minister Silvania ta drecha edifisio otro kaminda, pero pa 2 aña duana no a haña atenshon”, segun Margaritha. Ayera tardi duana na Punda, aeropuerto i duana reshèrshi ayera atardi a subi warda pa sigui duna servisio, pero awe mainta ta warda tur hende na Nieuwe Haven pa sa kiko ta bai pasa.

Pa loke ta trata gratifikashon, mirando ku diferente departamentu di gobièrnu a haña gratifikashon, i hasta den minister su ministerio tambe a haña, duana tambe ke. “E forma kon duana a traha pa entrada di belasting. E trahadó tambe ta haña ku nan meresé gratifikashon. Tin hefe di pòst a pidi gratifikashon pa trahadónan, i a nenga esaki. Trahadónan ke sa dikon nan tambe no tin derechi di gratifikashon”, sr. Margaritha a terminá bisando. NOTA: Texto ta scirbi den Papiamento fonetico di Corsou.