A suspende e dos polisnan envolvi den caso di tiramento fatal di un hoben

ORANJESTAD – Landsrecherche a suspende e dos polisnan envolvi den e caso di tiramento cu fin fatal di un hoben diadomingo. “E polisnan envolvi a wordo prohibi entrada den wardanan (di polis:red). Segun vocero di ministerio publico, ambos polis a wordo scucha como sospechoso. Ministerio publico a mustra cu ‘ta conciente cu e tiroteo tin impacto grandi riba comunidad di Aruba. “Pa e motibo aki, pa mas leu cu e investigacion ta permiti, OM lo percura pa informa regularmente tocante e investigacion y tocante e adelanto den e investigacion. 

E CASO

Manera ta conoci den oranan di mainta di diadomingo 9 di februari 2025 un tiroteo a tuma lugar, caminda e homber hoben A.C. Lanoy di 19 aña di edad a wordo alcansa pa balanan policial, y a bin na fayece. Esaki a hiba na gran emocion y na hopi tristesa cerca su famia y den comunidad completo.

INVESTIGACION

OM a sigura cu den un investigacion penal manera esaki, den cual polisnan ta envolvi den incidentenan di violencia cu ta termina cu morto, practicamente semper ta tuma lugar un investigacion independiente di Landsrecherche di Aruba. Landsrecherche ta un cuerpo investigativo cu ta neutral y cu ta independiente di Cuerpo Policial di Aruba.