Na Corsou a asesina hoben di 20 aña den su auto

WILLEMSTAD - Den korto tempu, Kòrsou ta konosé su di dos kaso di asesinato. Esaki a tuma lugá ayera tra’i mèrdia na Kaya Ser’i Popchi na Sun Valley. Un hóben di 20 aña a keda tirá i matá den su outo dilanti di porta di garashi di kas. Den kareda di 14.30, sentral di polis a risibí informashon di un kaso di tiramentu ku a tuma lugá den Kaya Ser’í Popchi. Mesora unidat polisial a bai na e sitio i nan a yega topa ku un hòmber sintá den un vehíkulo ku diferente perforashon di bala na su kurpa i no tabata duna señal di bida.

For di investigashon preliminar a sali na kla ku un vehíkulo a pasa i un hòmber ku kara tapá a baha for di e vehíkulo i lòs algun tiru dirigí riba e víktima. E outo tabata stashoná den garashi di un kas. E hòmber keda alkansá pa tiru na e parti ariba di su kurpa.

Despues di su akto e sospechoso a hui for di e sitio. Personal di ambulans a yega rápido na e sitio pero no por a hasi nada mas pa e víktima. Por a mira glas kibra abou na suela i tambe mancha di sanger banda di e vehíkulo. Dòkter di polis tambe a presentá na e sitio di krímen i a konstatá morto di e hòmber, Julien Jundrick Lucas, nasé dia 24 di òktober aña 2004 na Kòrsou. Riba òrdu di fiskal di Ministerio Públiko a konfiská e kurpa pa mas investigashon. Investigashon den e kaso akí ta kontinuá. NOTA: Texto ta scirbi den Papiamento fonetico di Corsou.