Maduro na Croes: Parlamento tin tur informacion pa trata prespuesto 2025!

ORANJESTAD – Minister di finanza demisionario Xiomara Maduro a contesta presidente di Parlamento Gerlien Croes dialuna, cu no mester tin ningun excuse pa trata e presupuesto 2025. E la reacciona despues cu siman pasa Croes a indica cu ta wardando riba Gobierno, pa por trata e presupuesto pasobra Gobierno ainda falta pa manda cierto documetonan. For di e contesta di Maduro por compronde cu Gobierno a manda tur cos caba. “Desde siman pasa e contestanan di Gobierno tambe a bay pa Parlamento, pues Presidente di Parlamento tin tur informacion pa asina por yama e reunion publico pa atende cu Presupuesto 2025” Maduro a bisa den un reaccion publico.

PRESUPUESTO ENTREGA NA TEMPO

Maduro a bisa cu “Presupuesto 2025 ta na Parlamento di Aruba desde 29 di augustus 2024”. Pa loke ta e ‘tardansa’, e ta mustra riba e hecho cu tabatin eleccion y “e desicion di Parlamento pa no trata Presupuesto 2025 prome cu e Gobierno nobo sinta” indicando cu no por usa esey como un excuse pa no trata e presupesto. Hasta a referi na e hecho cu ta e formacion di gobierno di cual e actual presidente di Parlamento ta un di e actornan principal, ta tardando mucho. “ Sinembargo e formacion ta tardando demasiado y esaki ta trece trabounan den peliger di core cu retraso grandi, entre nan, presupuesto 2026. Pues Minister Maduro ta spera cu pronto Parlamento por trata Presupuesto 2025 pa asina evita mas retraso” e mandatario a finalisa bisando.