AZV: Pensionadonan tin cu warda un poco mas pa haya nan remedi cubri

ORANJESTAD – E ehecucion di e decision di gobierno demisionario di MEP pa pone AZV cubri tur remedi pa pensionado, tin cu warda un poco mas. Asina AZV a anuncia diahuebs ultimo. Tabata riba dia 17 di December ultimo cu e minister demisionario di Salud Dangui Oduber a anuncia cu  “entrante 1 Februari 2025, tur remedi pa pensionadonan lo ta cubri completo bou di AZV”. Esaki awor ta conoce un retraso. 

TA DURA UN OF DOS LUNA MAS

Ayera AZV a informa cu relaciona cu e decision di Conseho di Minister di dia 17 di december 2024, Organo Ehecutivo di AZV ta informa cu nan a ricibi e decision y a inicia e evaluacion tecnico pa ehecucion di esaki. “Solamente cu e proceso aki ta tumando mucho mas tempo cu a premira inicialmente. Ta calcula cu e finalisacion di e parti tecnico lo tuma minimo 1 luna mas y maximo 2” AZV a sigui bisa. “Nos ta pidi nos disculpa pa e inconveniencia aki” AZV a bisa finalmente.