KPA: Comunidad mester ta cla pa cumpli cu ley di cacho

ORANJESTAD - Desde 1 di juli Cuerpo Policial a cuminsa cu un proyecto piloto pa cu e "Ley di Cacho", aproba den Parlamento riba dia 27 di december 2012. E proyecto ta encera e controlnan necesario relaciona na cumplimento di parti di comunidad cu e "Hondenverordening". A dicidi di cuminsa den districto di Noord pa atende cu e problematica di cachonan cu no ta ricibi e cuido adecua, unda cu ta informa y conscientisa doñonan di cacho encuanto di e bienestar di nan cacho(nan) y di animalnan en general.

CACHO DEN CURA

E proyecto ta hiba e nomber "Cacho den Cura", cu ta indicativo di e regla principal, esta cu cachonan mester ta den cura di nan doño y no riba caya of den mondi. Tres agente policial ta encarga cu e proyecto y ta trahando for di e oficina di Polis di Bario na Jaburibari. Cuerpo Policial ta urgi comunidad pa tene cuenta cu e Ley di Cacho ta vigente y cu infraccionnan ta nifica aplicacion di boetnan, cuminsando na 300 florin.

INFRACCION

Na momento cu constata un infraccion, Polis lo duna e ciudadano(nan) concerni un aviso/advertencia skirbi ("schriftelijke waarschuwing"). Si constata cu e ciudadano no haci caso di, no cumpli of no cumpli suficientemente cu e advertencia verbal, e agentenan policial lo duna un proces-verbaal, cual ta mara na un boet.

CONTROL

Cuerpo Policial lo ta controlando riba e siguiente infraccionnan, cu ta mara na e boetnan specifica aki: Cachonan cu ta los riba caminda publico, boet di 300 florin y si ripiti e infraccion e boet ta bira 500 florin. Cachonan cu no ta na un looplijn corecto, boet di 750 florin y si ripiti e infraccion e boet ta bira 1000 florin. E cacho no tin suficiente cuminda of e calidad di cuminda ta "eenzijdig" y/of di mal calidad, boet di 750 florin y si ripiti e infraccion e boet ta bira 1000 florin. E cacho no tin awa limpi y fresco continuamente, boet di 750 florin y si ripiti e infraccion e boet ta bira 1000 florin. E cacho no tin luga adecua pa sconde for di solo, awasero y biento, boet di 750 florin y si ripiti e infraccion e boet ta bira 1000 florin. E cacho ta causa problema den e bario, manera blaf continuamente of tin un holo stinki pa via di higiena deficiente, boet di 300 florin y si ripiti e infraccion e boet ta bira 500 florin.

TENE CACHO NA LIÑA

E doño of persona cu ta cana cu e cacho mester tene e cacho na liña. Si esaki no ta e caso y e cacho ta cana los cu e persona, polis lo aplica un boet di 300 florin y si ripiti e infraccion aki e boet ta bira 500 florin. Si e cacho ta malo y polis ta nota cu e doño no ta hiba e cacho veterinario, lo aplica un boet di 750 florin, y si e infraccion aki wordo ripiti lo aplica un boet di 1000 florin.

AMIGO

Cacho ta considera e miho amigo di e ser humano. E ta un di animalnan mas fiel y obediente, e ta e animal cu ta cuida nan famia y cas cu mas entusiasmo cu cualkier otro. Tene na cuenta cu nan recompensa, banda di cariño, ta e cuido cu nan ta ricibi y e cuido aki mester ta adecua. E cacho t'ey pa cuida abo y bo famia, en cambio abo mester tene cuenta cu bo mester cuid'e tambe.

RESPONSABILIDAD

Cuerpo Policial ta corda nos comunidad cu tin cacho ta bin cu cierto responsabilidad y ta pidi pa tur hende tene na cuenta cu tin un Ley di Cacho vigente na Aruba y e controlnan pa cu esaki a cuminsa.