AVB kier sigui cu Giovanni Franken como Bondscoach

ORANJESTAD - E ultimo siman nan , hopi informaciona circula rond den media rond di e seleccion Nacional di Aruba como tambe di e bondscoach Giovanni Franken. Den cuadro di interes general y desaroyo di futbol aki na Aruba, tin varios combersacion tras di cortina cu a tuma lugar internamente. Den esaki mes tambe cu a combersa cu e bondscoach, Giovanni Franken, pa cu e intencion di continua cu su persona den e funcion como bondscoach, teniendo na cuenta cu Aruba ta continua den e contienda pa clasificacion Mundial.AVB di su banda mes a mustra interes pa continua cu sr. Giovanni Franken como bondscoach, pa hunto nos purba na logra lo maximo pa cu e deporte rey y di e forma aki tambe evita cualkier stagnacion.Debi na su forma di traha como bondscoach, Giovanni Franken a logra hunto cu su team, subi Aruba di posicion riba e lista mundial di FIFA y asina impone un historia nobo, te cu hasta a jega asina leuw pa hunga e segundo rond.“Durante e ultimo dos aña, nos como team riba e nivel deportivo a sa di progresa enormemente. Tur hende por a mira e bon resultadonan, incluyendo mi mes y pa cu esaki nos tur tawata satisfecho tambe. Pesey mes tambe cu mi ta dirigi mi atencion riba e prestacion di parti e organisacion riba su mes. Esey na e momentonan aki ta hasta mas importante cu e propio futbol mes, pasobra un organisacion den crecimento progresivo ta haci cu den futuro bo tin un bon structura. Pues un bon organisacion ta na e momentonan aki crucial pa un organisacion di topsport, Giovanni Franken a declara.Y Aruba tin e deseo di continuidad aki 2 aña riba e trayectoria di positivismo y ta pa e motibo aki mes nos ta den combersacion cu otro pa profesionalisa entre otro e organisacion pa un termino largo.”E vice-president sr. Lysander Besselink, durante un combersacion cu e bondscoach a intermedia den esaki. Segun e vice-presidente, cu e la constata cu e turbulencia tawata tin di haber cu falta di claridad riba afspraak nan cu a keda haci entre partidonan internamente y cu implementacion di esaki tampoco no a cana segun palabracion haci. Su persona a duna di conoce, cu esaki sigur ta un momento di aprendisahe den cuadra di e trajecto di desaroyo di e bond, cu ta netamente ocupa cu restructuracion pa profesionalisa e bond.E vice-presidente a bisa: "hasta organisacionnan cu ta opera den un forma profesional, tin tendencia di comete errornan y error ta keda humano. Pero esaki sin perde for di bista, cu ta importante pa nos siña di e error aki, pa evita e mesun cos bek den futuro”. AVB ta para cienporciento tras di e bondscoach y su team, sin importa kico por a wordo bisa den momentonan di emocion den prensa of door di prensa.“Nos tin comprencion pa e reaccion emocional di parti algun di e hungadornan y ta compronde tambe cu nan kier a saca esaki for di nan systema. Mi no ta descarta cu e hungadornan tin e mas mihor intencion y ta nota esaki door di e desaroyo den e comportacion e ultimo dos añanan cu a transcuri, pero tambe riba tereno di wega y ta pa es motibo aki mes cu personalemnte mi ta sinti cu nan ta para tambe tras di nan coach. Naturalmente cu mi opinion ta cu tur e acontesimiento aki por bay di un total otro manera, pero e la sosode di e forma con e la sosode y awor no ta keda nada otro pa tur hende envolvi siña for di esaki”.Awor aki nos ta bay opera di e forma corecto. Esaki nifica cu ta activa e organisacion operacional di AVB, caminda cu diferente cuerpo lo bay reuni cu otro pa haci afspraak nan concreto pa evita e mesun error tras di lomba. E organisacion operacional lo haya sosten naturalmente di e organo ejectuvo, esta e bestuur di AVB. Di e forma aki cada afspraak haci lo mester keda cumpli, pa di e forma aki pone enfasis bek riba e interes general y di desaroyo di e futbol Arubano”.