Na Corsou, finalmente ta 8 di 14 partido politico ta bay eleccion na maart

WILLEMSTAD - E partidonan Movementu Kousa Promé ku na kabes sra. Giselle Rosalia i Partido Mihó Kòrsou di Gilbert Ricardo tambe ta den elekshon di 21 di mart próksimo. Esaki ta despues di sostenementu di lista di den wikènt. Por a sostené lista na 11 instituto i 1 na SDKK.

Sra. Richeline Joe presidente di KSE a informá ku tabatin 8 partido ku a bai pa sostenementu di lista dia 1 i 2 di febrüari. E resultado ta un total di 4540 voto bálido, miéntras tabatin 83 voto inválido i no tabatin niun voto blanku. Pa elekshon di 21 di mart kada partido mester tabatin 848 voto di sosten. Dos partido a surpasá 848 voto kual ta Movementu Kousa Promé ku 1006 voto i Partido Mihó Kòrsou ku 1522 voto. Pues un total di 8 partido ta bai partisipá na elekshon di 21 di mart próksimo. E partidonan aki ta: PAR, MFK, MAN-PIN, KEM, TPK, PNP i Mihó Kòrsou i Movementu Kousa Promé.

Sra. Joe a sigui bisa ku lo bai aserka e 8 partidonan aki pa nan kaba di traha riba posibel fayonan ku tin riba lista, i ku mester keda koregí, p’e lista ta kla pa bai elekshon. Dia 7 febrüari ta determiná definitivamente kua ta partido ku lo bai elekshon dia 21 di mart próksimo. Lo haña sa abase di sierto fayo ku partidonan mester bai traha riba dje. Dia 13 di febrüari lo tin skohementu di number i koló di partido. Pa dia 21 di mart tin mesun kahanan di karton pa depositá e “stembiljet” aden, sra. Joe a bisa.

Un biaha mas partido Union i Progreso (UP) di Elvis de Andrade a bolbe keda afó ora el a haña 720 voto. Na 2021 e tabatin 627 voto. Sra. Marulla Chirino ku na 2021 a bai kue partido “Awor Ta Basta” a haña 350 voto, ku MDDK el a avansá, pero a keda kòrtiku ku 525 voto. Pa loke ta trata Movementu Kousa Promé a haña mas tantu voto na 2021 kompará ku ayera kual ta respektivamente 1285 i 1006 (2025). Partido Mihó Kòrsou a sa di kue riba 200 voto, kual ta na Sentro di Bario St. Maria ku 260, i na Maris Stella VSBO Montaña el a haña 239. Kousa Promé tambe a hala bastante voto na Maris Stella VSBO na Montaña di 250 voto.

Durante sostenementu di lista, Kranshi tambe a yuda den e proseso i por a saka sédula pa bai vota. Di akuerdo ku e hefe di Kranshi, sra. Ruthline Haddocks en total 993 sédula ku a keda saka den e dos dianan aki ku a habri pa sostenementu di lista.

Kuerpo Polisial di Kòrsou ta satisfecho kon komunidat a komportá durante di pre-elekshon. Seguridat na i rondó di urnanan bai bon, i no tin nada partikular pa relatá durante e dos dianan. NOTA: Texto ta scirbi den Papiamento fonetico di Corsou.