Jeon ta join Farruko, Fariana y Alex Sensation p’e tema nobo “Ven Ven”

MIAMI - E artista di Aruba , nomina pa Grammy, Jeon, ta bin bek cu un poderoso colaboracion cu e exito, “Ven Ven”, hunto cu Farruko, Fariana y Alex Sensation. Originalmente graba como un tema solista ‘Savaneta’ pa Jeon y produci p’e reconocido Steve Andreas, e cancion rapidamente a capta e atencion di e figuranan grandi di musica global, acumulando miyones di views y downloads.

Ora cu Alex Sensation - destacado locutor di radio, DJ y cantante - a scucha pa prome biaha e cancion “Savaneta” di Jeon, el a keda inmediatamente cautiva. Inspira p’e contagioso ritmo Caribense di e tema y e estilo caracteristico di Jeon, Alex Sensation a comparti esaki cu Farruko, kende tambe a keda atrapa pa su energia. Reconociendo e potencial di e cancion, a dicidi colabora y a invita e artista Colombiano Fariana pa hiba e tema un otro nivel.

“Ven Ven” ta un fusion di vibrante ritmo Caribense y influencia Latina, cu e cuater artistanan aportante nan bos unico pa crea un cancion cu ta priminti domina e listanan di exito. E video  musical, dirigi p’e visionario Guillermo Figueredo na Miami, ta un impresionante obra visual cu ta complementa a la perfeccion e electrisante esencia di tema.

Reflexionando riba e emocionante colaboracion aki, Jeon a expresa: “Ta un placer pa traha cu Alex Sensation, Farruko y Fariana y uni nos islanan a traves di musica. Semper mi a sinti pasion pa “showcase” Aruba y mi raiznan na mundo y e cancion aki ta otro paso rib’e caminda aki.”

Jeon, reconoci pa su habilidadnan pa fusiona ritmo Caribense cu sonido global, a construi un presencia internacional solido cu exito manera “Machika” hunto cu J Balvin y “X” cu J Balvin y Nicky Jam. Su trabao ta sigui kibra barera, hibando e sonidonan rico di Aruba y Papiamento rib escena global.

“Ven Ven” ya ta disponibel riba tur plataforma di streaming, incluyendo YouTube, Spotify, Apple Music y mas.