- Gabinete AVP-Futuro: 100 Dia di liderazgo hunto, compromiso y progreso
- Gobierno ta anuncia aumento pa e.o. subsidio escolar
- AHATA: Alohamento na ‘AirBnB’ a crece y no na hotel
- Aruba Marriott Resort & Stellaris Casino ta nombra Arubiano como gerente nobo
- ATIA: Blackout ta costa comercio di Aruba miyones!!
Corte di Apelacion ta posibilita apelacion contra veredictonan di Colegio di Apelacion di Aruba
ORANJESTAD - Den su veredicto di 28 di november 2024, Corte di Apelacion a husga cu Colegio di Apelacion (College van Beroep – CvB) di Aruba den casonan di seguridad social no ta un corte independiente y imparcial segun e definicion di articulo 6 di e Tratado pa Proteccion di Derechonan Humano y Libertadnan Fundamental (EVRM). P'esey, desde awor, Corte di Apelacion ta considera su mes autorisa pa tuma nota di apelacionnan contra veredictonan di CvB.
Den cinco ordenanza nacional cu ta trata e topico di seguridad social, a stipula cu por apela desicionnan di Banco di Seguro Social (Sociale Verzekeringsbank – SVb) na CvB. Tambe a stipula cu CvB ta e prome y unico instancia cu ta tuma desicion tocante di e apelacion. Esaki ta significa cu segun e cinco ordenanza nacional, no por apela e veredictonan di CvB. Ta trata di seguro di biehes, seguronan di viuda y huerfano, seguro di accidente, seguro di malesa y cesantia.
Corte di Apelacion ta husga cu no por califica CvB como corte independiente y imparcial, pasobra den e regulacionnan existente no ta garantisa suficientemente e independencia ni e imparcialidad. Den e diferente ordenanza nacional y e decretonan nacional corespondiente a stipula cu CvB ta consisti di tres miembro nombra pa Minister, esta un presidente cu ta hurista, un miembro di circulonan di empleado y un miembro di circulonan di dunador di trabao. Sin embargo, e Minister autorisa pa e nombramentonan aki mes ta responsabel pa e ordenanzanan nacional y nan implementacion pa SVb. Ademas, e ordenanzanan nacional no ta prescribi cu e presidente mester ta miembro di e poder hudicial. Tambe a stipula cu e nombramento di e presidente ta temporal, y cu eventual renombramento ta depende di e mesun Minister. Ademas, e mesun Minster por duna e presidente retiro pa motibo di mal conducta of inmoralidad, of den caso di descuido reitera den e desempeño di e funcion. Esakinan ta criterionan inherentemente vago, y p'esey nan ta vulnerabel.
Pa resolve e contrariedad cu articulo 6 di EVRM, Corte di Apelacion ta busca coneccion cu e ordenanzanan nacional existente den mayor medida posibel. P'esey, desde awor, Corte di Apelacion ta considera su mes autorisa pa tuma nota di apelacionnan presenta pa interesadonan contra veredictonan di CvB.
Por consulta e veredicto riba www.rechtspraak.nl bao di number ECLI:NL:OGHACMB:2024:238.
A detene persona cu ta maneha scol particular ‘Nederlands Onderwijs Aruba ilegalmente
Conseho di minister di Reino a nombra huez nobo pa Aruba
DEN HAAG - Sra. A.M.M. (Anne) Vingerling lo wordo nombra como miembro nobo di Corte Conhunto di Husticia. Conseho di Minister di Reino a aproba e nominacion pa nombramento riba proposicion di Secretario di Estado Struycken (Proteccion Hurídico). Sra. Vingerling lo wordo nombra entrante 15 di augustus 2025 y lo ta basa na Aruba. E lo ta parti di e team di derecho civil. Actualmente señora Vingerling ta huez na Corte di Distrito di Den Haag. Einan e ta activo den e sector di derecho di famia. E ta tambe un entrenador di hueznan stagiaire einan. Anteriormente e tabata traha como huez na Corte di Distrito di Den Haag den e sector di derecho administrativo y tabata un abogado di lesion personal y abogado di empresa.
Ministerio Publico a informa De Meza awe mainta si e ta sospechoso of no
ORANJESTAD - Ministerio Publico diaranson mainta laat, a informa prensa cu nan a cumpli cu e decision di Huez di 25 di juni 2025 den e caso sumario di señor De Meza. Ministerio Publico a informa señor De Meza den un carta si e ta/no ta sospechoso den un investigacion cu ta andando y di cual articulo den Ley ta trata. Sinembargo ainda no ta conoci, si e ta sospechoso of no, pasobra e parti ey, OM no a informa. Solamente cu e la informa de Meza. Pero, mientrastanto, Noticiacla a compronde cu e informacion cu de Meza a haya, ta cu e ta sospechoso. Pero cu e no a wordo informa, di kico.
OM: Ministerio Publico no ta obliga pa bisa ‘pakico’ de Meza ta sospechoso
ORANJESTAD – Mientras cu Corte a ordena Ministerio Publico informa sr Mike de Meza, si e ta sospechoso den un caso, y tin cu haci esaki dentro di 14 dia, Ministerio Publico no ta obliga pa revela e naturalesa exacto, ni e motivo di e sospechoso, manera señor De Meza a pidi den e kort geding . Asina Ministerio Publico ta reacciona diaranson mainta riba e sentencia den e caso entama contra nan door di sr de Meza.
Corte: Ministerio Publico tin 2 siman pa bisa de Meza si e ta un sospechoso, y di kico
ORANJESTAD – Ministerio Publico tin 14 dia tempo pa notifica Mike de Meza si e ta un sospechoso den un investigacion andando, y si ta asina, na cua delitonan penal e sospecho den e investigacion ei ta relaciona actualmente, caminda un designashon di artículo i/òf cualificacion di e ofensanan aki ta sufisiente. Ademas ta ordena cu e ehecusion di e desicion aki ta provishonalmente ehecutabel, no obstante cualkier apelacion. Asina Corte a dicta diaranson mainta den e caso cu siman pasa de Meza a entama contra Ministerio Publico. Noticia den proceso. Click AKI pa e sentencia.
Corte ta sentencia muher na 30 luna di prizon pa contrabanda di hende
ORANJESTAD - Diahuebs corte a trata e caso cu ta carga e nomber di 24Rose. E hues a condena N.M.M.U. di nacionalidad Colombiana di 37 aña y biba na Corsou, na 2 aña y mei di prison (30 luna) pa traficacion y contrabanda di hende . Aki ta trata di cinco victima Colombiana. E presidente di Hof a expresa explicitamente su aprecio pa e dossier cu a ser construi cu hopi cautela.
Follow NoticiaCla
